Хабарҳо
КОРМАНДИ «ҶУМҲУРИЯТ» БО МУКОФОТИ ДАВЛАТӢ ҚАДР ШУД
Ба ифтихори Ҷашни 31-солагии Истиқлоли давлатии Ҷумҳурии Тоҷикистон сардори шуъбаи ҳуқуқи рӯзномаи «Ҷумҳурият» Ҷумъазода Фирӯз Раҳмониён бо Фармони Президенти Ҷумҳурии Тоҷикистон муҳтарам Эмомалӣ Раҳмон бо Ифтихорномаи Ҷумҳурии Тоҷикистон қадр шуд. Мукофоти давлатиро Эмомалӣ Насриддинзода, ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа, дар вазъияти тантанавӣ тақдим намуд.
Эмомалӣ Насриддинзода ҳайати кормандони рӯзномаро бо фарорасии Ҷашни Истиқлоли давлатӣ табрик намуда, аз ҷумла иброз дошт, ки рӯзномаи «Ҷумҳурият» миёни матбуоти кишвар мақому мартабаи хосса дорад. Ин рӯзномаи воқеан ҳам миллӣ аз замони таъсисёбӣ то имрӯз дар пиёда сохтани сиёсати давлату Ҳукумат нақши арзанда дорад.
- Мо мебинем, ки доираи мавзуъҳои инъикоскунандаи рӯзнома фарох буда, сар карда аз фарҳангу иҷтимоиёт то иқтисоду сиёсатро дар бар мегирад ва бо итминони комил метавон гуфт, ки дар боло бурдани ҳисси худшиносии миллӣ дар ҷомеа саҳмгузор аст. Басо рамзист, ки дар арафаи ин ҷашни муқаддас корманди рӯзнома бо Ифтихорномаи Ҷумҳурии Тоҷикистон сарфароз гардид, ки боиси ифтихори тамоми кормандони «Ҷумҳурият» мебошад, - гуфт Эмомалӣ Насриддинзода.
Инчунин, бахшида ба Ҷашни Истиқлоли давлатӣ Лашкар Шарифзода, сардори шуъбаи иттилоот, Ташрифулло Саъдуллоев, сармутахассиси шуъбаи иқтисод ва иҷтимоиёт ва Маҳмуд Мирзоён, сармутахассиси шуъбаи ҳуқуқи рӯзнома барои нашри силсиламақолаҳои таҳлилӣ доир ба мавзуъҳои мухталиф бо ифтихорномаҳои Суди Олии иқтисодӣ ва Академияи илмҳои кишоварзии Тоҷикистон сарфароз гардиданд.
Комрон САФАР, «Ҷумҳурият»
Баёни ақида (0) Санаи нашр: №: Мутолиа карданд: 2488