Хабарҳо
АШТ. АВЛАВИЯТ БА РУШДИ САНОАТ
Ҷиҳати татбиқи нақшаву барномаҳои қабулшуда, вусъати корҳои ободониву созандагӣ ва бо мақсади сазовор истиқбол намудани 35-солагии Истиқлоли давлатии Ҷумҳурии Тоҷикистон дар ноҳияи Ашт чун дар дигар шаҳру навоҳии кишвар бунёди чандин иншооти дорои аҳамияти иқтисодиву иҷтимоӣ дар назар аст.
КОРГОҲИ ҶУРОББОФӢ
Аз ҷумла, дар Ҷамоати деҳоти Шодобаи шаҳраки Гулшан коргоҳи ҷуроббофӣ бо иқтидори 30 ҳазор ҷуфт дар як шабонарӯз ва бо ташкили 150 ҷойи нави кор пешбинӣ гардидааст. Арзиши лоиҳавии коргоҳ зиёда аз 910 ҳазор долларро ташкил медиҳад.
БИНОИ НАВ БАРОИ 620 ХОНАНДА
Сохтмони бинои нави Муассисаи таҳсилоти миёнаи умумии №25 ба номи Турсунбой Бегматов, воқеъ дар деҳаи Ашти Болои деҳоти Ашт оғоз ёфта, барои 620 хонанда дар як баст пешбинӣ шудааст. Арзиши лоиҳавии Муассиса 15 миллиону 388,1 ҳазор сомонӣ буда, бо маблағгузории Хазинаи саудии рушд бунёд мегардад.
Бинои нави Муассисаи таълимӣ аз 4 чор ошёна иборат буда, дар он 24 синфхона, китобхона, қироатхона, ошхона, маҷлисгоҳ, озмоишгоҳи кимиёвӣ ва физика, утоқҳои фаннии кимиё, биология, физика, технология (барои писарону духтарон), технологияи иттилоотӣ, омодагии дифои ҳарбӣ ҷойгиранд.
МАРКАЗИ САВДО
Сохтмон ва бунёди маркази савдо бо арзиши наздик 700 ҳазор сомонӣ дар деҳаи Хуҷамбердиеви деҳоти Ошоба аз ҷониби соҳибкор Нуралӣ Тӯхтабоев амалӣ мешавад.
Бинои марказ бо тарҳи муосир бунёд ёфта, дар арафаи анҷомёбист. Иншоот аз 2 ошёна иборат аст. Бо мавриди баҳрабардорӣ қарор гирифтани он наздики 10 нафар соҳиби ҷойи кор мешавад.
Ҷовиди АШТӢ,
“Ҷумҳурият”
Баёни ақида (0) Санаи нашр: №: Мутолиа карданд: 2394