Дар чаҳорчӯби Ҷашнвораи байналмилалии XIV синамои Тошкент таҳти унвони “Дурдонаи Роҳи абрешим”   13 сентябр маросими  ифтитоҳи “Рӯзҳои синамои СҲШ” баргузор мешавад. Дар он намунаҳои беҳтарини филмҳои ҳунарии синамогарони кишварҳои узви СҲШ ба намоиш гузошта мешаванд. 

Дар ин бора раиси Агентии кинематографияи Ӯзбекистон Фирдавс Абдухолиқов иттилоъ дод. Ба гуфтаи ӯ коргардонҳои Тоҷикистон, Ӯзбекистон, Ҳиндустон, Қазоқистон, Қирғизистон, Чин, Покистон ва Россия беҳтарин филмҳои худро ба ин Ҷашнвора пешниҳод хоҳанд кард. 

– Дар баробари ин, кишварҳои нозир – Беларус, Эрон ва Муғулистон, инчунин кишварҳои шарики муколамаи СҲШ – Озарбойҷон, Арманистон ва Туркия низ намунаҳо аз филмҳои ҳунарии худро дар Ҷашнвора ба намоиш хоҳанд гузошт, – изҳор дошт Ф. Абдухолиқов.

Тавре раиси Агентии кинематографияи Ӯзбекистон тазаккур дод, ҳайати синамогарони кишварҳои СҲШ намунаи асарҳои нави худро ба ин Ҷашнвора пешниҳод кардаанд.

Гуфта мешавад, ки санъати синамо дар фазои минтақаи Шанхай шонси беназиреро барои инъикоси фарҳанг, таърих, анъана ва мероси фалсафии кишварҳои узви СҲШ фароҳам хоҳад овард. Фирдавс Абдухолиқов ба ин нукта низ таъкид намуд, ки ба хазинаи Агентӣ, аллакай, беш аз 15 филми истеҳсоли муштарак бо кишварҳои СҲШ ворид шудаанд, ки дар Ҷашнвора намоиш дода хоҳанд шуд.

15-16 сентябр дар шаҳри Самарқанди Ӯзбекистон нишасти навбатии сарварони кишварҳои узви СҲШ баргузор мегардад. Дар он президентони ҳашт кишвари узви СҲШ, инчунин, се кишвари нозир ва се кишвари шарики муколамаи он ширкат мекунанд. 

Маросими ифтитоҳи Ҷашнвораи байналмилалии XIV синамои Тошкент маҳз дар арафаи ин нишаст ба вуқуъ хоҳад пайваст ва 18 сентябр дар Самарқанд ба анҷом мерасад.

 

Мирасрор АҲРОРОВ,  “Ҷумҳурият”