Хабарҳо
ҲАЙКАЛИ ФИРДАВСӢ АКНУН САМАРҚАНДРО ЗИНАТ МЕБАХШАД
10 сентябр дар шаҳри Самарқанд пайкараи шоири бузурги форсу тоҷик Абулқосими Фирдавсӣ қад афрохт. Ҳайкали ин шоири номвар дар майдони нави ба номи шоир, дар маҳаллаи Панҷоби Самарқанд ҷой гирифт.
Дар маросими ифтитоҳ вакилони ҳокимияти вилоят, намояндагони халқ, масъулони илму фарҳанг ва рӯзноманигорон иштирок доштанд. Мушовири раиси вилояти Самарқанд Н. Алиев аз ин падидаи фарҳангӣ хушнудӣ изҳор карда, гуфт: «Фирдавсӣ шоири бузурги ҷаҳонист ва осори безаволи ӯ – «Шоҳнома» робитаи моро бо форсизабонони дунё таҳким мебахшад. Шодем, ки муҷассамаҳои устодони сухан Рӯдакӣ ва Фирдавсӣ аз ин ба баъд зеби шаҳри Самарқанданд».
Сармуҳаррири муштараки ҷаридаҳои «Зарафшон» ва «Самаркандский вестник» Ф. Тошев низ изҳор намуд, ки Фирдавсӣ бо шукӯҳи осори хеш Ӯзбекистонро бо Эрону Тоҷикистон мепайвандад. Ибтикороти мадании Президентамон Шавкат Мирзиёев дар мисоли чорабинии имрӯза исбот месозад, ки фарҳанг барои давлати мо аҳамияти бисёр муҳим дорад.
Устоди Донишгоҳи давлатии Самарқанд М. Муҳиддинов дар бораи фаъолияту эҷодиёти Абулқосими Фирдасӣ ва мавқеи он дар адабиёти ҷаҳон ҳарф зад. Бино ба гуфтаи ӯ, имрӯз «Шоҳнома»-и Фирдавсиро олимону шоирон, нависандагону мутарҷимон ва таърихнигорони дунё меомӯзанд ва ҳама ба як овоз арза медоранд, ки «Шоҳнома» беҳтарин ва бузургтарин асари ҳамосӣ аст, ки саропо аз ватандӯстӣ ва ҷавонмардиву паҳлавонӣ қисса мекунад.
Саидазиз Исҳоқов, мудири Анҷумани дӯстии Ӯзбекистону Эрон, чунин иттилоъ дод: «Ду моҳ қабл дар назди мадрасаи қадимаи Панҷоб ба сохтмони майдони Фирдавсӣ оғоз кардем. Пайкара омода буд, то зеби ин мадраса гардад. Мадрасаи Панҷоб аз 24 ҳуҷра иборат буда, дар он, асосан, забонҳои форсӣ, арабӣ, англисиро меомӯзанд. Ҳамин тавр, дар шафати мадраса муҷассамаи Пири Тӯс қомат афрохт ва, ба ин васила, ин даргоҳи маърифат низ, таъмиру таҷдид шуд».
Ёдовар бояд шавем, ки дар чанд ҳафтаи охир, аллакай, ин дувумин ибтикори наҷиби фарҳангист. Нахуст, 31 август пайкараи устод Абуабдуллоҳи Рӯдакӣ ифтитоҳ ёфта буд ва пас аз се рӯз сафири фавқулода ва мухтори Тоҷикистон дар Ҷумҳурии Ӯзбекистон Абдуҷаббор Раҳмонзода аз он дидан кард.
Бузургмеҳри БАҲОДУР, «Ҷумҳурият»
Баёни ақида (0) Санаи нашр: №: Мутолиа карданд: 2913