Хабарҳо
ТАҶЛИЛИ РӮЗИ ИСТИҚЛОЛИ ДАВЛАТӢ ДАР БМТ
Дар Бонки миллии Тоҷикистон 31-умин солгарди Истиқлоли давлатии Ҷумҳурии Тоҷикистон таҳти раёсати раиси БМТ Ҳоким Холиқзода бо шукӯҳу шаҳомати хос таҷлил шуд.
Ҳоким Холиқзода зикр кард, ки Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки дар таҳкими пояҳои давлатдорӣ ва Истиқлоли давлатии Тоҷикистон нақши муҳим ва калидӣ доранд, мазмуну моҳияти ин падидаи нодири таърихиро барои мардуми Тоҷикистон чунин арзёбӣ кардаанд: “Истиқлоли давлатӣ бузургтарин ва муқаддастарин неъмат, нишонаи олии ҳувияти миллӣ, ифтихор ва номуси ватандорӣ, рамзи миллати бостонӣ ва асоси хушбахтию сарбаландии сокинони Тоҷикистон мебошад”.
Ҳамчунин, тазаккур дод, ки ташаккули низоми бонкдории муосири Тоҷикистон низ ба шарофати Истиқлоли давлатӣ муяссар шуд. Дар ин давра дар Бонки миллии Тоҷикистон ва низоми бонкии мамлакат тағйироти назарраси миқдорӣ ва сифатӣ ба амал омада, кормандони Бонк бо меҳнати бунёдкорона ва садоқатмандонаи хеш дар таҳкими дастовардҳо саҳм мегузоранд ва нақши онҳо дар пешрафти ин соҳаи муҳими ҳаёти мамлакат мусбат арзёбӣ мешавад.
Дар даврони соҳибистиқлолӣ, хусусан тайи чанд соли охир, ҳаҷми қарздиҳӣ, миқдори амалиётҳо ва андозаи захираҳои байналмилалӣ садҳо маротиба афзуда, масалан, ҳаҷми қарзҳои хурд дар моҳҳои январ – августи соли 2022 ба 6,3 миллиард сомонӣ баробар гардид.
Як нукта боиси таъкид аст, ки то 31 августи соли 2022 ҳаҷми амонату пасандозҳо тақрибан 12 миллиард сомониро ташкил намуд, ки дар муқоиса ба ҳамин санаи соли гузашта 21,5 фоиз бештар буда, аз болоравии эътимоди мардум ба низоми бонкӣ шаҳодат медиҳад.
Бонки миллии Тоҷикистон ба сифати мақоми танзимкунандаи бахши бонкию молиявии мамлакат, татбиқи сиёсати пулию қарзиро баҳри мусоидат ба рушди иқтисодиёт, устувории низоми бонкӣ ва нигоҳдории муътадилии сатҳи нархҳои дохилӣ равона менамояд.
Дар натиҷа, таварруми солона (дар 12 моҳи охир) дар моҳи июли соли 2022 ба 8,3 фоиз баробар гардид, ки дар қиёс ба ҳамин давраи соли рафта 0,8 банди фоизӣ кам мебошад.
– Дар маҷмуъ, саъю талоши роҳбарият ва кормандони Бонки миллии Тоҷикистон барои то андозае устувор боқӣ мондани қурби пули миллӣ, аз байн бурдани бозори сиёҳи фурӯши асъори хориҷӣ, афзоиши ҳиссаи пардохтҳои ғайринақдӣ ва ғайра мусоидат кард ва натиҷаҳои мусбат ба бор овард. Акнун вақти он расидааст, ки рушди босуботи низоми бонкии кишварро ҳадафи олии фаъолияти минбаъдаи худ қарор диҳем, – гуфт Ҳоким Холиқзода.
Муҳаммадзоиршо ШАРИФЗОДА, “Ҷумҳурият”
Баёни ақида (0) Санаи нашр: №: Мутолиа карданд: 2926