Дар Ҷашнвораи XVIII байналмилалии кинои кишварҳои мусалмон, ки дар шаҳри Қазони Ҷумҳурии Тотористони Федаратсияи Россия доир шуд, филми бадеии коргардони тоҷик Умед Мирзоширинов – «Додараки фариштаҳо» соҳиби ҷоизаи «Беҳтарин филми кӯтоҳметраж» гардид.

Ҷашнвора аз 7 то 11 сентябр доир гардид. Тавре сомонаи kazan-mfmk.com иттилоъ медиҳад, ба Ҷашнвора аз 44 кишвари дунё беш аз 600 дархост барои иштирок ворид шуд. Ба барномаи он 50 филм шомил гардид, ки ҳайати ҳакамон аз ин миён беҳтаринҳоро интихоб ва бо ҷоизаҳо қадр намуданд.

«Додараки фариштаҳо» соли гузашта аз рӯйи ҳикояи Сайф Раҳимзоди Афардӣ бо заҳмати коргардон Умед Мирзоширинов ва наворбардор Шуҳрат Қурбонов  рӯйи пардаи синамо омад. Нахустнамоиши филм аввали соли ҷорӣ дар Кинотеатри ба номи Тоҳир Собирови Муассисаи давлатии «Тоҷикфилм» сурат гирифта, аз ҷониби ихлосмандони олами синамо гарм пазироӣ шуд.

Филм ба тамошогарон ҳаёти бачаи 7 – 8-солаеро манзур медорад, ки волидонаш пойбанди  расму оин ва хуруфот мебошанд. Волидон ва ҳамсояҳо ӯро сабаби асосии фавти хоҳараконаш мешуморанд, ки ин ба руҳу равони кӯдак бетаъсир намемонад. Писарак тасмим мегирад, ки тибқи анъана пояшро сӯзонад ва, ба ин васила, хоҳараконашро аз марг бираҳонад. Ӯ ба ин минвол на танҳо хоҳараконашро наҷот додан мехоҳад, балки собит месозад, ки дар марги онҳо ҳеҷ гуноҳе надорад. Ин амалаш суде ба бор намеорад, аммо ӯ боз ҳам навмед нест. Барои шод кардани модару аз хона дур андохтани дарду ранҷ ва бим додани марг рӯзи марги хоҳараки навбатиаш кошонаашонро ба шодӣ мубаддал месозад.

Мавриди зикр аст, ки «Додараки фариштаҳо» имсол дар нахустин Синамоҷоизаи миллӣ – «Тоҷи Сомон» ҷоизаи беҳтарин филми кӯтоҳметражро  соҳиб гардид.

Зимнан, коргардон Умед Мирзоширинов то ин замон чандин филмҳои дигаре низ офаридааст, аммо миёни ҳаводорони олами синамо филми «Муҷассамаи ишқ» маълуму машҳураш намуд. 

 

Фарзона ФАЙЗАЛӢ, «Ҷумҳурият»