Хабарҳо
ВАРЗИШ
«ҶОМИ ПОЯГУЗОРОНИ САМБО»
Акмалиддин мақоми аввалро касб кард
Самбочии номвари кишвар, қаҳрамони ҷаҳон Акмалиддин Каримов (-58кг) дар мусобиқаи байналмилалии «Ҷоми поягузорони самбо» (10-11 сентябр, Москва, Россия) медали тилло гирифт.
Акмалиддин Каримов дар самбои варзишӣ дар финал Харун Тлишеви русро мағлуб кард.
Тибқи иттилои Кумитаи миллии олимпӣ, дар ҳисоби даставӣ оид ба самбои варзишӣ миёни мардон мунтахаби Тоҷикистон баъд аз дастаи мизбон, ки дар шаш вазни дигар ғолиб омад, мақоми дуюмро касб кард.
Ёдовар мешавем, ки «Ҷоми поягузорони самбо» қаблан ба хотираи Анатолий Харлампиев доир мегашт.
БОКС
Ғалабаи навбатии Муҳаммад Яъқубов
Дар мусобиқаи «RCC Boxing Promotion» (Челябинск, Россия) боксёри маъруфи тоҷик Муҳаммад Яъқубов бо қарори доварон бар Кароос Даниел Кордоба (Аргентина) ғолиб омад.
Муҳаммад дар ҳисобаш 19 ғалаба ва 1 бохт дорад. Рақибаш бошад, 15 набард анҷом дода, 7 маротиба бохтааст.
Натиҷаи қувваозмоиҳои даври 15-уми Лигаи олӣ
Дар бозии даври 15-уми Чемпионати Тоҷикистон оид ба футбол миёни дастаҳои Лигаи олӣ «Истиқлол» ба дарвозаи «Эсхата» ду голи беҷавоб зада, бо 30 хол мавқеашро дар зинаи аввал мустаҳкам кард.
Бар пояи иттилои ЛФТ, вохӯриҳои дигари давр бо чунин натиҷа хотима ёфтанд: КМВА – «Хуҷанд» – 1:0, «Регар-ТадАЗ» – «Истаравшан» – 1:2, «Равшан-З» – «Равшан-К» – 2:2 ва «Хатлон» – «Файзканд» – 0:0.
Ду медали гӯштигирони собиқадор
Паҳлавонони тоҷик Оятулло Қамарӣ ва Неъматулло Арсонқулов дар Чемпионати ҷаҳон оид ба ҷудо миёни собиқадорон (8 – 11 сентябр, Краков, Лаҳистон) медали биринҷӣ ба даст оварданд.
Дар ҳисоби даставӣ Тоҷикистон миёни 60 давлати иштирокчӣ бо 2 медали биринҷӣ, як ҷойи панҷум ва ду ҷойи ҳафтум мақоми 41-умро гирифт.
Волейболбозони итолиёвӣ – қаҳрамони ҷаҳон
Мунтахаби Италия дар финали Чемпионати ҷаҳон оид ба волейбол (Лаҳистон ва Словения) Лаҳистонро бо ҳисоби 3:1 (25:22, 21:25, 18:25, 20:25) мағлуб намуда, унвони қаҳрамониро ба даст овард.
Барои ишғоли зинаи сеюм Бразилия бар Словения ғалаба кард.
Алкараси 19-сола таърихи нави теннисро менависад
Теннисбози 19-солаи испанӣ Карлос Алкарас пас аз ғалаба дар Чемпионати кушоди ИМА дар радабандии ATP ба мақоми аввал мебарояд ва ҷавонтарин ракеткаи рақами як дар таърих мешавад.
Ӯ дар мусобиқоти «Тоскулоҳи бузург»-и ИМА 23 соату 40 дақиқа дар корт бозӣ кардааст, ки рекорд ба ҳисоб меравад.
Алкарас дар финал Каспер Рудди норвегиро бо натиҷаи 6:4, 2:6, 7:6(1), 6:3 шикаст дода, аввалин қаҳрамониашро дар мусобиқаи “Тоскулоҳи бузург” сабт намуд.
Маҳмуд БАҲРОМ, шореҳи варзиш
Баёни ақида (0) Санаи нашр: №: Мутолиа карданд: 2993