Бо далели он, ки варзиш гарави саломатӣ аст, Ҳукумати ҷумҳуриамон ба  соҳа таваҷҷуҳи махсус зоҳир менамояд. Дар 31  соли соҳибистиқлолии кишвар соҳаи варзиш хеле рушд намуд. Дар он саҳми Сарвари давлат боиси зикри хос мебошад.

Ин муддат барои рушди  варзиши ҳам кӯдакон ва ҳам калонсолон чораҳои зиёде андешидаву роҳандозӣ гардиданд. Барои  он, ки кӯдакон бештар ба варзиш майл пайдо намоянд, дар муассисаҳои таҳсилоти миёнаи умумӣ ба таълими фанни тарбияи ҷисмонӣ диққати махсус дода мешавад. Чуноне ки аҳли маориф медонанд, дар замони шуравӣ барои хонандагон китоби фанни тарбияи ҷисмонӣ мавҷуд набуд. Ин мушкил дар замони Истиқлоли давлатӣ роҳи ҳалли худро ёфт. Барои муҳассилини синфҳои як то 11-уми муассисаҳои таҳсилоти миёнаи умумӣ китобҳои тарбияи ҷисмонӣ нашр гардиданд, ки ин кори мо – омӯзгорони фанро хеле осон намуд. Дар ин китобҳо тарзи дурусти ҳаракат ва машқи бадан, инчунин, маълумот дар бораи намудҳои гуногуни варзиш тавассути аксҳо нишон дода шудаанд. Ин ҳама ба хонандагон  имкон медиҳад, ки мустақилона ба обутоби дурусти бадан машғул шаванд. 

Ман ба ҳайси устоди фанни варзиш мегӯям, ки ин ҳама боиси ба варзиш  шавқи бештар пайдо намудани наврасону ҷавонон гардид. Чизи дигаре, ки боиси ҷалби бештари онҳо ба  варзиш шуд, ин сохтани майдончаҳои варзишӣ на танҳо дар пойтахт, балки дар деҳаҳои дурдасти кишвар мебошад. Сохта ба истифода додани ин гуна майдончаҳо имкон фароҳам овард, ки ҷавонон бештари вақти холии худро дар онҳо сипарӣ созанд. Ин боиси хушҳолии волидон низ ҳаст, зеро варзиш гарави солимӣ мебошад. Ин чунин маъно дорад, ки наврасони мо ҳамчун ояндаи миллату давлат солиму бардам ба воя мерасанд.

Солҳои охир барои рушди варзиши кӯдакону наврасон  мусобиқаҳои гуногуни варзишӣ роҳандозӣ мешаванд. Вазъи тарбияи ҷисмонӣ миёни хонандагони муассисаҳои таҳсилоти миёна ва олӣ сол ба сол беҳтар гардида истодааст. Ҳоло дар мактабҳои махсуси варзишии кишвар ҷавонон, хосса бонувон низ бошавқ машқ менамоянд. 

Тибқи мушоҳидаҳо тули 20 соли охир дар ҷумҳурӣ таэквон-до (ИТФ) зиёд рушд карда, таэквондочиён дар солҳои гуногун чемпиони ҷаҳон, Осиё ва, ҳатто, ғолиби Ҷоми Аврупо гардиданд.

Қобили таваҷҷуҳ он аст, ки  варзиши маъюбон низ аз мадди назари Пешвои миллат ва Ҳукумати кишвар  дур намонд. Соли 1991 Федератсияи  тарбияи  ҷисмонӣ ва варзиши маъюбони Ҷумҳурии Тоҷикистон ташкил шуд, ки баъдтар  узви Кумитаи паралимпии  ҷаҳон гардид. Соли 2003 дар кишвар Кумитаи паралимпии Тоҷикистон таъсис ёфт. Федератсияи тарбияи ҷисмонӣ ва варзиши маъюбон ҳамасола якҷоя бо Кумитаи кор бо ҷавонон ва варзиш оид ба намудҳои мухталифи варзиш мусобиқаҳои ҷумҳуриявӣ баргузор менамояд. Ба ғайр аз ин, варзишгарони маъюби тоҷик мунтазам дар мусобиқаҳои байналмилалӣ  ширкат варзида, ба натиҷаҳои назаррас ноил мешаванд. Онҳо замони Истиқлоли давлатӣ, хусусан дар Бозиҳои паралимпии Юнон (Афина), Чемпионати Осиё оид ба дастхобонӣ, Бозиҳои паралимпии Малайзия (Куала-Лумпур), Чемпионати ҷаҳон оид ба вазнбардорӣ, Бозиҳои паралимпии Хитой (Пекин) иштирок карда, бо сазовор шудан ба ҷойҳои ифтихорӣ шарафи варзиши тоҷикро боло бурданд. 

Натиҷаи ғамхорӣ, дастгирӣ ва таваҷҷуҳи хоси Пешвои миллатамон муҳтарам Эмомалӣ Раҳмон ба соҳаи варзиш боиси рушди бесобиқаи он  гардид. Басо гуворост, ки ҷавонони мо шарафи варзиши  кишварро дар Осиёву Аврупо боло мебаранд. Ба шарофати муваффақиятҳояшон парчами моро боло бардоштаву суруди миллиамон танинандоз мегардад.

 

Сурайё ҶУМЪАЕВА, 

омӯзгори фанни тарбияи ҷисмонии МТМУ № 21-и 

шаҳри Душанбе