Раиси ВМКБ аз иншоотҳои сохташаванда дидан кард

Раиси Вилояти Мухтори Кӯҳистони Бадахшон Мирзонабот Алишер Худобердӣ бо мақсади шиносоӣ аз рафти корҳои ободонию созандагӣ ва фаъолияти корхонаҳои амалкунанда аз ноҳияи Дарвоз дидан кард. Дар маркази ноҳия – шаҳраки Қалъаихумб раиси вилоят бо ҷараёни кор дар  сохтмони бинои меҳмонхона ва маркази хизматрасонӣ шинос гардид. Иншооти мазкур чорошёна буда, аз ҷониби соҳибкорони маҳаллӣ бо маблағи 10 миллион сомонӣ сохта шуда истодааст. 

 

Ба раиси вилоят иттилоъ доданд, ки дар дохили бино фурӯшгоҳ, сартарошхона, кошонаи ҳусн, меҳмонхона  ва ҳуҷраҳои алоҳида барои дигар намудҳои хизматрасонии маишӣ ҷой дода мешаванд. Ба роҳбарияти ноҳия ва масъулини сохтмон ҷиҳати сари вақт ва босифат анҷом додани корҳои сохтмонӣ, ба тартиб даровардани гирду атрофи бино ва рафъи камбудиҳои ҷойдошта муҳлат ва супоришҳои иловагӣ дода шуданд. 

Дар маркази ноҳия раиси вилоят, ҳамчунин, аз маркази тафреҳии "КARON SPA center", ки дар арафаи Ҷашни Истиқлоли давлатӣ мавриди истифода қарор гирифт, дидан кард. Он аз ҷониби соҳибкорони ватандӯст бунёд гаштааст. 

 

ДАРВОЗ – МИНТАҚАИ САНОАТИИ БАДАХШОН

Мирзонабот Алишер ҳамчунин, бо фаъолияти корхонаҳои саноатии амалкунандаи  ноҳия шинос шуд. Тибқи маълумоти дастрас, ноҳияи Дарвоз  аз минтақаҳои саноатии вилоят буда, айни ҳол  дар ин ҷо 11 корхонаи саноатӣ  фаъолият менамояд.

Ҷамъияти  дорои масъулияти маҳдуди "Меваҳои Бадахшон" воқеъ дар  мавзеи Дуробаки деҳоти Нулванд аз ҷумлаи  чунин корхонаҳост, ки дар даврони соҳибистиқлолии кишвар бунёд гардидааст. Дар ин ҷо коргарон, асосан, ба истеҳсол ва бандубасти маҳсулоти мевагӣ тавассути технологияи муосир машғуланд. Раиси вилоят зимни  мулоқот бо  коргарони корхона зикр кард, ки шуҳрати меваҳои шаҳдбори  Бадахшон, аз ҷумла ноҳияи  Дарвоз, кайҳо аз ҳудуди кишвар ҳам берун баромадааст. Вале бо  фаъолияти як корхонаи  коркарди мева имрӯз қаноат кардан ғайриимкон аст. Дар ҳудуди вилоят, хусусан ноҳияҳои  поёнии вилоят,  намудҳои гуногуни мева мавҷуданд ва  бештари онҳо ҷиҳати аз истифода берун монданашон пӯсида нобуд мегарданд. Бинобар ин,  раиси вилоят аз масъулини корхона талаб кард, ки фаъолияти мунтазамро ба роҳ монда, истеҳсолотро ҳарчи бештар тавсеа бахшанд. Дар идомаи сафар  Мирзонабот Алишер аз Парки инноватсионии саноатию технологӣ дидан намуд. Зикр гардид, ки  Парки мазкур дар доираи сафари кории Президенти мамлакат ба  ноҳияи Дарвоз мавриди истифода қарор дода шуд. Дар ин ҷо ду корхона муҷаҳҳаз бо муосиртарин технологияи коркарди асал, истеҳсоли обҳои ташнагишикан, сарпӯшҳои муҳофизатии сохтмонӣ (каска) бо мақсади татбиқи ҳадафи чоруми миллӣ – саноатикунонии босуръати мамлакат амал мекунад. Дар Парки инноватсионии саноатию технологӣ, ҳамчунин, ду гармхонаи замонавӣ ба парвариши ниҳолҳои дарахтони ситрусӣ, аз қабили афлесун, мандарин, лимӯ ва сабзавот, машғул аст.  

       

БУНЁДКОРИҲО ИДОМА ДОРАНД

Ба раиси вилоят раиси ноҳияи Дарвоз Абдураҳмонзода Саидбурҳони Саидраҳмон иттилоъ дод, ки дар доираи Ҷашни муқаддаси миллӣ – 31-солагии Истиқлоли давлатии Ҷумҳурии Тоҷикистон дар ноҳия сохтмони корхонаи истеҳсоли масолеҳи сохтмонӣ ва сехи макаронбарорӣ идома дорад. Дар корхонаи истеҳсоли масолеҳи сохтмонӣ, асосан, ротбанду шпатлёвка истеҳсол мегардад, ки  дар вилоят талабот ба онҳо зиёд аст. Таъкид шуд, ки минбаъд дар сохтмонҳо ба истифодаи  масолеҳи истеҳсоли корхонаҳои маҳаллӣ афзалият дода шавад.

Раиси вилоят аз рафти кори бунёди хонаҳои истиқоматӣ барои 14 хоҷагии деҳаи Умарак, ки бар асари фаромадани сел манзилҳои истиқоматиашон зарар дида буданд, шинос гардид. Мирзонабот Алишер таъкид намуд, ки маҳз  бо супориши Пешвои миллат муҳтарам Эмомалӣ Раҳмон барои  ин хоҷагиҳо дар мавзеи бехатар  қитъаи замин ҷудо гашта, сохтмони хонаҳои нав барои оилаҳои зарардида ба нақша дароварда шудааст. Бинобар ин, масъулонро зарур аст, то дар иҷрои супориши  Сарвари давлат масъулияти бештар дошта бошанд ва сифати корҳои сохтмонӣ ба талаботи замон ҷавобгӯ бошад. Ин туҳфаҳои Президенти мамлакат бояд барои онҳо даҳсолаҳо хизмат намоянд.

Раиси вилоят ҷиҳати ба тартиб даровардани гирду атроф, таъмини неруи барқ ва оби ошомиданӣ, мумфарш ва чарғонкунии деҳаи навтаъсис ба масъулин супоришҳои мушаххас дод.

 

Раҳмони ГУЛЗОР, “Ҷумҳурият”