Хабарҳо
СҲШ. САМАРҚАНД МЕҲМОНОНРО БО ШОҲКОРИИ НАВ ИСТИҚБОЛ МЕГИРАД
Шаҳри бостонии Самарқанд дар ин рӯзҳои фараҳбахш беш аз пеш ҷило ва шукӯҳи наву тоза касб кардааст. Аз тамошои кӯчаву хиёбонҳо ва майдонҳои бошукӯҳи он ҳувайдост, ки шаҳр мизбони як чорабинии муҳиму бонуфузи байналмилалист. Парчами кишварҳои иштирокчии нишасти навбатии сарварони давлатҳои узви Созмони ҳамкории Шанхай, аз ҷумла Парчами давлатии Ҷумҳурии Тоҷикистон дар фазои он, парфишонӣ мекунад.
– Самарқанд барои истиқболи меҳмонони олимақом аз 14 кишвари дунё куллан омода мебошад. Давоми се соли охир дар шаҳр корҳои зиёди созандагӣ сурат гирифтанд. Яке аз иншооти ҷолиби он, ки бо тарҳи наву замонавӣ бунёд гардидааст, шаҳри этнографӣ ё «Шаҳри абадӣ» мебошад, – гуфт ба «Ҷумҳурият» сухангӯи ҳокими вилояти Самарқанд Манучеҳр Мирзоев.
Иттилоъ доданд, ки шаҳраке андар шаҳри Самарқанд дар масоҳати умумии 212 гектар бунёд ёфта, ҷамъи нусхаҳои ёдгориҳои таърихиву меъмории Самарқанд, Бухоро, Хива ва Шаҳрисабзро дар худ таҷассум намудааст. Манораи калон, Чорминор, Арки шоҳ, Мадрасаи мири араби Бухорои Шариф, ёдгориҳои таърихиву меъмории Шаҳрисабзи Қадим ва амсоли он дар «Шаҳри абадӣ» қомат афрохтаанд, ки на хусусияти фароғатӣ, балки характери намоиширо касб намудаанд. Ҳар фарде, ки ба ин ҷо меояд, мебинад, ки дар шаҳрҳои бостонии болозикр кадом ёдгориҳои таърихиву меъморӣ мавҷуданд.
– Дар баробари ҳамаи ин чаҳор меҳмонхонаи бошукӯҳу замонавии барои меҳмонони нишасти сарварони кишварҳои узви СҲШ дарҳои худро боз намудаанд. Конгресс-Ҳол ва амфитеатр макони асосии роҳандозии чорабиниҳои дигар дар доираи ҳамин нишаст хоҳад шуд, – тазаккур дод Манучеҳр Мирзоев.
Ёдовар мешавем, ки 15-16 сентябри соли ҷорӣ таҳти раёсати Ӯзбекистон дар шаҳри Самарқанд нишасти 22-юми сарварони давлатҳои узви Созмони ҳамкории Шанхай – Россия, Чин, Қазоқистон, Қирғизистон, Ҳиндустон, Покистон, Тоҷикистон ва Ӯзбекистон доир мегардад. Дар нишасти мазкур роҳбарони се давлати нозир – Беларус, Ҷумҳурии Исломии Эрон ва Муғулистон ширкат мекунанд. Инчунин, президентони Туркия, Озарбойҷон, Туркманистон ва Арманистон ба ҳайси меҳмонони ифтихорӣ ба Самарқанд даъват шудаанд.
Мирасрор АҲРОРОВ, «Ҷумҳурият»
Баёни ақида (0) Санаи нашр: №: Мутолиа карданд: 3383