«ШАБЕ БО МАСЪУДИ БУЗУРГ»

Чунин ном дошт маҳфили шеъру сурудҳои меҳандӯстона, ки ба хотири 21-умин солгарди шаҳодати Қаҳрамони Афғонистон Аҳмадшоҳи Масъуд дар Сафорати Ҷумҳурии Исломии Афғонистон дар Тоҷикистон баргузор гардид.

 

Дар он додари сипаҳсолори Панҷшер – Аҳмадвалӣ Масъуд сухан ронда, аз тоҷикон, бавижа аз Пешвои миллат муҳтарам Эмомалӣ Раҳмон барои ёрмандии моддиву маънавӣ дар ду давраи муқовимат сипосгузорӣ кард.

Ёдовар бояд шавем, ки Аҳмадшоҳи Масъуд 9 сентябри соли 2001 аз тарафи террористон ба шаҳодат расонда шуд.

 

 

МАНИЖА САНГИН БА «ШАҲРИ ОФТОБ» МЕОЯД

Манижа Сангин, яке аз маъруфтарин чеҳраҳои эстрадаи ҷаҳон, 9-уми октябр ба шаҳри Душанбе меояд, то баҳри мухлисони тоҷикистониаш барномаи консертӣ гузаронад. Консерт «Шаҳри Офтоб» ном дошта, дар Кохи «Суруш»-и пойтахт баргузор мешавад. «Шаҳри Офтоб» номи рамзии Душанбест.

 

Ёдовар бояд шавем, ки Манижа ҳунарманди тоҷиктабор буда, ин аввалин сафар баъди солҳои тулонӣ ба зодгоҳаш аст.

 

 

БОНУИ ТОҶИК – БАРАНДАИ ШОҲҶОИЗА

Саврибегим Гулмамадова, устоди факултети химияи ДМТ, дар 15-умин Форуми байналмилалии занҳои ихтироъкори ҷаҳон миёни 500 ихтироъгар барандаи Шоҳҷоиза гардид.

 

Дар ин форум, ки дар шаҳри Сеули Кореяи Ҷанубӣ баргузор шуд, аз 30 кишвари аъзои Созмони ҷаҳонии моликияти зеҳнӣ иштирок доштанд ва мавзуи асосӣ: "Истифодаи пайвастаҳои комплексии руҳ ҳамчун маводи доруворӣ зидди бемориҳои ғадуди сипаршакл” буд. 

Ҳамчунин, устоди дигари Донишгоҳи мазкур Муқаддас Қурбонова бо ихтирои худ – "Истифодаи хӯлаҳои алюминӣ бо бериллий дар саноати мошинсозӣ" сазовори медали тилло шуд.

 

Бузургмеҳри БАҲОДУР,

«Ҷумҳурият»