Чанде пеш роҳбарияту кормандони Вазорати тандурустӣ ва ҳифзи иҷтимоии аҳолии Тоҷикистон, кормандони раёсати тандурустии шаҳри Душанбе, роҳбарони муассисаҳои тандурустии пойтахт бори чорум бо ваксинатсия фаро гирифта шуданд. Бино ба иттилои маркази матбуотии Вазорат, нахуст Ҷамолиддин Абдуллозода, вазири тандурустӣ ва ҳифзи иҷтимоии аҳолӣ, ҳамроҳи муовинон ва кормандони дастгоҳи ин ниҳод бар зидди COVID - 19 ваксина гирифтанд.

Ёдовар мешавем, ки бо назардошти вазъи мураккаби бемории COVID-19 дар якчанд кишварҳои ҳамсоя шуруъ аз 16 августи соли равон даври чоруми маъракаи ваксинатсия бар зидди сирояти коронавирус миёни кормандони соҳаи тандурустии кишвар оғоз гардида, то 13 сентябри соли 2022 зиёда аз 736 000 нафар бо ваксинатсия фаро гирифта шудааст. Ин рақам 13,6 дарсадро ташкил медиҳад. Айни ҳол дар ҷумҳурӣ ваксинаҳои “Файзер” ва “КоронаВак” барои гирифтани иммунизатсия ба аҳолӣ дастрас мебошанд.

Сардори раёсати бехатарии санитарию эпидемиологӣ, ҳолатҳои изтирорӣ ва ёрии таъҷилии тиббии Вазорат Наврӯз Ҷаъфаров гуфт: “Касоне, ки аз 60-сола боло буда, ваксинаи сеюмро се ё шаш моҳ пеш гирифтаанд, метавонанд ваксинаи чорумро қабул намоянд. Тибқи нақша, баъд аз табибон шаҳрвандони синни аз 60 боло, шахсони дорои бемориҳои музмини ғайрисироятӣ бо вояи чоруми ваксина фаро гирифта мешаванд”.

Гарчанде дар байни аҳолии кишвар ҳолатҳои гирифторӣ ба бемории коронавирус ба қайд гирифта нашудааст, дар робита ба он ки дар кишварҳои ҳамсоя хуруҷи чандинбораи он авҷ гирифтааст, сокиноне, ки бар зидди бемории коронавирус ваксина нагирифтаанд, ба муассисаҳои тиббии ҷойи зисти худ ҳарчи зудтар муроҷиат намоянд.

Дар робита ба афзоиши ҳолатҳои сироят аз коронавирус дар кишварҳои ҳамсоя, санҷишҳо дар сарҳад ва фурудгоҳҳо пурзӯр шуд. Мусофироне, ки тариқи роҳи ҳавоӣ ё заминӣ сафар мекунанд, бояд бо худ гувоҳнома (сертификат)-и ваксина зидди коронавирусро дошта бошанд. Ғайр аз ин, ҳарорат санҷида мешавад ва агар он баланд бошад, тести коронавирус гирифта шуда, танҳо пас аз маълум шудани натиҷаи тест чораҳои зарурӣ меандешанд. Маълумоти шахс ба дармонгоҳи маҳалли зист фиристода шуда, ӯ зери муоинаи табибон қарор мегирад. Меҳмонон  ба дармонгоҳи макони иқомат (хонаи иҷора, меҳмонхона) фиристода мешаванд.

Ҳамзамон,  қайд кардан бамаврид аст, ки бо дастгирии ҳамаҷонибаи Ҳукумати Ҷумҳурии Тоҷикистон, Вазорати тандурустӣ ва ҳифзи иҷтимоии аҳолӣ ва шарикони ҳамкор пайваста ба кишвар вояҳои ваксинаҳои зидди сирояти нави коронавирус ворид шуда истодаанд. Аз моҳи марти соли 2021 давра ба давра 18,1 миллион вояи ваксинаҳои “Модерна”, “Файзер”, “АстраЗенека”, “КоронаВак”, “Гам-Ковид-Вак” ворид шуда, тибқи талабот ва нақшаи миллӣ ба шаҳру ноҳияҳои кишвар дастрас шудаанд.

Аз аввали чорабинии иммунизатсия зиёда аз 5,3 миллион нафар (98,5%) бо вояи якум, зиёда аз 5,2 миллион бо вояи дуюм (96,9%) ва зиёда аз 5 миллион кас бо вояи сеюм (93,7%) бар зидди сирояти COVID-19 ба иммунизатсия фаро гирифта шудаанд. 

Талоши пайвастаи Ҳукумати Ҷумҳурии Тоҷикистон дар мавриди давра ба давра бо вояҳои лозимии ваксинаҳои босифат ва самараноки тасдиқкардаи СҶТ фаро гирифани мардум танҳо бо маърифати баланди тиббии ҷомеа самара медиҳанд.

 

Бузургмеҳри БАҲОДУР,

“Ҷумҳурият”