паҳлавонони дохилу хориҷро ба ҳам меорад

19 – 20 сентябр дар Қасри варзиши шаҳри Хуҷанд IX мусобиқаи байналмилалӣ оид ба дзюдо барои дарёфти Ҷоми Президенти Тоҷикистон доир мегардад.

Бар пояи маълумоти Кумитаи миллии олимпӣ, барои дарёфти ҷом дар баробари паҳлавонони кишвар гӯштигирон аз кишварҳои ҳамсоя ширкат меварзанд.

Мусобиқа аз рӯи 5 вазн миёни мардон (-66 кг, -81 кг, -90 кг, -100 кг ва +100 кг) ва 2 вазн миёни бонувон (-57 кг ва -63кг) сурат мегирад.

Ғолибон 40 000 сомонӣ, барандагони ҷойҳои дуюм ва сеюм мутаносибан 20 000 ва 10 000 сомонӣ мегиранд. 

Ёдовар мешавем, ки зӯрозмоиҳо барои дарёфти Ҷоми Президенти Тоҷикистон аз соли 2013 инҷониб баргузор мегарданд. 

 

 

 

ҶОМИ ТОҶИКИСТОН – 2022

Пирӯзии «Истиқлол» ва мусовии «Хатлон»

Бозиҳои аввали даври нимниҳоии Ҷоми Тоҷикистон – 2022 дар варзишгоҳи марказии шаҳри Ҳисор баргузор гардиданд. Дастаи «Истиқлол» бо голи задаи Далер Имомназаров (дақ.78) бар «Эсхата» пирӯз омад.

Тибқи иттилои ЛФТ, вохӯрии дастаҳои «Хатлон» ва «Кӯктош» мусовӣ (0:0) ба анҷом расид. Қувваозмоиҳои ҷавобии марҳилаи 1/2 ниҳоии Ҷоми кишвар рӯзҳои 15 ва 16 октябр доир мешаванд. 

 

 

 

ЛИГАИ ЧЕМПИОНҲО 

Як гол ва ду рекорд

Лионел Месси, ҳамлагари дастаи «ПСЖ», пас аз голи задааш дар бозии даври дуюми марҳилаи гурӯҳии Лигаи чемпионҳо ба дарвозаи тими «Маккаби» якбора ду рекорд гузошт.

Футболбози аргентинӣ аввалин бозигаре шуд, ки дар 18 мавсими Лигаи чемпионҳо гол задааст. Месси аз рӯи ин нишондод аз Карим Бензема («Реал Мадрид», 17 мавсим) пеш гузашт. 

Инчунин, ӯ дар ин мусобиқоти бонуфузи аврупоӣ дарвозаи 39 дастаро рахна кардааст. Криштиану Роналдуи португалӣ (38 даста) дар мақоми дуюм қарор дорад. 

 

Маҳмуд БАҲРОМ, шореҳи варзиш