Хабарҳо
НАВИДИ ФАРҲАНГ
ХУФ – ВОДИИ ЗЕБОМАНЗАРИ БАДАХШОН
Бо ибтикори Мақомоти иҷроияи маҳаллии ҳокимияти давлатии ноҳияи Рӯшон Фестивали экологӣ – фарҳангӣ таҳти унвони «Ганҷи Бадахшон» баргузор гардид.
Саҳмдорони ин чорабинии судманд Ташкилоти ҷамъиятии «Кӯҳҳои Помир» ва «Кӯҳсори Бадахшон» дар рустои Хуфи деҳоти Пастхуф буданд. Фестивал бо ширкати коршиносони масоили муҳити зист, олимони Институти биологии Помири Академияи миллии илмии Тоҷикистон гузашт.
Деҳаи Хуфи ноҳияи Рӯшон дар баландии 2700 метр аз сатҳи баҳр, миёни чаҳор кӯҳи сар ба афлок ҷой гирифта, аз хушманзаратарин водиҳои кишвари мост. Дар бораи ин макон ҳанӯз дар солҳои аввали асри бист мардумшиноси машҳури рус Михаил Андреев асари калонҳаҷми «Тоҷикони водии Хуф» - ро интишор дода буд.
Ҳозирин таъкид карданд, ки чунин чорабиниҳо барои рушд ва тарғиби сайёҳии кӯҳнавардӣ бисёр муфид аст.
МУАССИСАИ ТАЪЛИМИИ ТОҶИКӢ ДАР ӮЗБЕКИСТОН
Дар Ҷумҳурии Ӯзбекистон тоҷикон бо дӯстони ӯзбекашон аҳлона кору зиндагӣ доранд. Яке аз ин ноҳияҳо, ки бештар мардуми Мастчоҳ муқимиянд, ноҳияи Бӯка аст. Чанде пеш тоҷикони деҳаи Истошони ин ноҳия бо маблағи худ ва тавассути ҳашар мактаб сохтанд.
Гуфта мешавад, ки сохтмони муассиса тирамоҳи соли 2021 оғоз ёфта, ба маблағи 3 миллион сомонӣ ба истифода дода шуд. Дар ҳашар ҳамарӯза аз 150 то 300 нафар сокини маҳаллӣ ширкат меварзид.
Мактаб, ки таҳти рақами 5 ба қайд гирифта шуд, дар он 350 хонанда дар як баст таҳсил мекунад.
МЕҲМОНОНИ ОКСФОРД ВА КЕМБРИҶ ДАР ПАНҶАКЕНТИ ҚАДИМ
Як гурӯҳ ҷаҳонгардон аз ду донишгоҳи маъруфтарини ҷаҳон - Оксфорд ва Кембриҷ ба дидани ёдгориҳои таърихии Панҷакенти Қадим ва Санҷаршоҳ омаданд.
Дар ин бора бостоншинос, муҳаққиқи Панҷакенти Қадим Абдураҳмон Пӯлодов хабар дод. Ба гуфтаи ӯ, меҳмонон пас аз ошноӣ дар шабакаҳои иҷтимоӣ бо муҳити таърихиву табиати хушманзари Панҷакент ба дидани шаҳр шавқманд шудаанд.
Ёдовар бояд шавем, ки ёдгориҳои мазкур дар номинаи феҳристи ёдгориҳои ҷаҳонии ЮНЕСКО шомил буда, дар доираи барномаи «Роҳи бузурги Абрешим: долони Зарафшон - Қароқум» омӯхта мешаванд.
Бузургмеҳри БАҲОДУР, «Ҷумҳурият»
Баёни ақида (0) Санаи нашр: №: Мутолиа карданд: 2195