Хабарҳо
СУҒД. ҶАМЪОВАРИИ САРИВАҚТИИ ҲОСИЛИ ПАХТА - МАСЪАЛАИ РӮЗ
Дар ҳамаи навоҳии пахтакори вилояти Суғд маросими ҷамъоварии оммавии ҳосили пахта оғоз ёфт.
Соли равон деҳқонони вилоят майдони кишти ин зироати техникиро бо назардошти рӯёндани ашёи пурқимати саноатии пахта нисбат ба ҳамин давраи соли 2021 наздик ба 7,5 ҳазор гектар зиёд карда, то ба 57 ҳазору 159 гектар расонданд. Инак, талошу такопӯйҳои кишоварзон самар бахшида, ҳосили фаровон муҳайё шуд, ки бо истифода аз боду ҳавои мусоид мебояд онро сари вақт ва беталаф ҷамъоварӣ кард.
Бино ба иттилои Абдуазиз Маҳмудзода, муовини сардори раёсати кишоварзии вилоят, ҳоло дар пахтазори вилоят зиёда аз 40 ҳазор нафар ба ҷамъоварии ҳосил машғул буда, то 15 сентябр хирмани оростаашон аз 8 ҳазор тонна гузашт.
Ҷиҳати ҳавасмандии чинакчиён мусобиқа миёни навоҳии пахтакор, хоҷагиҳои деҳқонӣ ва ҷамоатҳо ташкил гардида, дар ҳар 20 рӯз ҷамъбаст ва ғолибон бо мукофотҳои пуливу молӣ ҳавасманд мешаванд. Феълан, рафти ҷамъоварии пахта дар навоҳии Бобоҷон Ғафуров, Спитамен ва Ҷаббор Расулов хуб ба роҳ монда шудааст.
Тибқи дурнамо, дар мавсими имсола кишоварзони вилоят бояд хирмани умумии пахтаро то ба 133 ҳазор тонна расонанд.
Ҷовиди АШТӢ, “Ҷумҳурият”
Баёни ақида (0) Санаи нашр: №: Мутолиа карданд: 3123