Хабарҳо
ҶОМИ ОСИЁ – 2023
Бозигарони ҷавони тоҷик ба марҳилаи ниҳоӣ роҳ ёфтанд
Дастаи мунтахаби ҷавонони Тоҷикистон (U-20) таҳти роҳбарии сармураббӣ Аҳлиддин Турдиев дар мусобиқаи интихобии Ҷоми Осиё – 2023 дар гурӯҳи «I» мақоми аввалро (7 хол) ишғол намуда, ба қисми ниҳоии мусобиқот (1–18 марти соли 2023, Ӯзбекистон) роҳ ёфт.
Футболбозони тоҷик дар вохӯрии охир, ки тақдири роҳхати мустақимро ҳал мекард, бо ҳамсолони худ аз Камбоҷа вориди майдон шуданд. Бозигарони мо бо бозубандҳои сиёҳ ва бо дақиқаи хомӯшӣ ба хотири кушташудагон дар муноқишаи марзӣ бозиро оғоз намуданд.
Дар ҳузури беш аз 5000 мухлис аз шуруъ ҷавонони мо бозиро идора мекарданд, аммо дар нимаи аввал ба онҳо муяссар нагардид, ки дарвозаи рақибро рахна намоянд. Дар қисми дуюми дидор Амадонӣ Камолов (дақ.58) мунтахаби моро ба пеш баровард. Баъд аз гузашти шаш дақиқа Сокнет Хав ҳисобро баробар намуд. Сипас, бозигарони Камбоҷа дар дохили ҷаримагоҳашон бо даст бозӣ карданд, ки довар зарбаи 11-метра таъин намуд. Бежан Нишонбойзода тӯбро вориди тӯри дарвоза намуд, ки дар натиҷа тими мо бо ҳисоби 2:1 ғолиб омад.
Дар ду қувваозмоии қаблӣ мунтахаби мо Лубнонро бо ҳисоби 4:0 шикаст дода, бо Сингапур мусовӣ (0:0) кард.
ФУТЗАЛ
Тими миллӣ барои омодагӣ ба АМА сафар кард
Дар доираи омодагӣ ба марҳилаи финалии Ҷоми Осиё – 2022 тими миллии Тоҷикистон оид ба футзал зери роҳбарии Пайрав Воҳидов ба Дубай сафар намуд.
Тибқи иттилои ФФТ, дар ҳайати даста 14 нафар ҷалб шуда, дар ҷамъомади тамринию таълимӣ зӯрозмоӣ бо чанд дастаи Амороти Муттаҳидаи Араб дар назар аст.
Ёдовар мешавем, ки дар Ҷоми Осиё – 2022 (27 сентябр – 8 октябр, Кувайт) мунтахаби мо шомили гурӯҳи «В» буда, бо Баҳрайн (27 сентябр), Ӯзбекистон (29 сентябр) ва Туркманистон (1 октябр) неру месанҷад.
Маҳмуд БАҲРОМ, шореҳи варзиш
Баёни ақида (0) Санаи нашр: №: Мутолиа карданд: 3449