Мир24. Вазорати корҳои хориҷии Чин хабар дод, ки Беларус ва Чин расман шарикони ҳамаҷониба ва стратегӣ шуданд. Ин  маънои онро дорад, ки кишварҳо аз ҷиҳати сиёсӣ, иқтисодӣ ва амниятӣ ҳамдигарро дастгирӣ хоҳанд кард. На рӯзномаи байналмилалӣ ва на вазъи дохили кишвар ба ин таъсир намерасонад, ҳамкориҳои Чин тақрибан тамоми соҳаҳо, пеш аз ҳама, саноат ва технологияи рақамиро фаро мегиранд.

Барои Беларус Чин пас аз Россия дуюмин шарики тиҷоратӣ мебошад. Дар мулоқоти охири раҳбарони ду кишвар тасмимҳои стратегӣ қабул шуданд. Онҳо ба саноати автомобилсозӣ, истеҳсоли нуриҳои калий ва масъалаҳои молиявӣ дахл доранд. Вазифаҳои ояндаи наздик тезондани ҳамкориҳои технологӣ ва сармоягузорӣ, таҳкими ҳамкориҳои байни минтақаҳо мебошанд.

 

 

 

Таҳримҳо, терроризм, ҷанг пайомадҳои натиҷаи амалҳои якҷонибаанд

 

Синхуа. Иброҳим Раисӣ, Президенти Ҷумҳурии Исломии Эрон, гуфт, ки таҳримҳо, терроризм, ҷанг ва хунрезӣ пайомадҳои натиҷаи амалҳои якҷониба ҳастанд. Дар ин бора агентии ИРНА хабар додааст.

Иброҳим Раисӣ дар фурудгоҳи Ню-Йорк, ки барои ширкат дар иҷлосияи 77-уми Маҷмаи умумии Созмони Милали Муттаҳид омадааст, бо хабарнигорон суҳбат кард.

Президенти Эрон таъкид намуд, ки СММ бояд созмони на танҳо қудратҳои бузург, балки тамоми миллатҳо бошад ва афзуд, ки аз имкониятҳои иҷлосия истифода бурда, мавқеъ ва дидгоҳи Эронро муаррифӣ хоҳад кард. Ӯ иброз дошт, яке аз мушкилоти ҷаҳоние, ки метавонад дар ин нишаст баррасӣ шавад, ин аз тарафи баъзе аз кишварҳои абарқудрат истифода бурдани таҳримҳо барои фишор овардан ба давлатҳои дигар мебошад, ки ин хилофи сулҳу амният аст.

Иброҳим Раисӣ афзуд, ки терроризм, ҷангу хунрезӣ низ мушкилоти ҷиддие ҳастанд, ки бояд бо хиради дастаҷамъӣ ҳал шаванд.

 

 

 

Даъвати СММ аз роҳбарони кишварҳо

 

Синхуа. Раиси иҷлосияи 77-уми Маҷмаи умумии СММ Чаба Короши изҳор намуд, дар шароите, ки ҷаҳон бо буҳронҳои гуногун рӯ ба рӯ мешавад, афзалият додан ба Ҳадафҳои Рушди Устувори СММ аз ҳарвақта дида муҳимтар  аст.

"17 ҳадафи ҷаҳонӣ рӯйхати корҳои мост. Онҳо бояд рӯйхати корҳои ҳамаи роҳбарони дар ин толорбуда шаванд. Мо он одамоне ҳастем, ки метавонем ин феҳристи корҳоро барои тамоми ҷаҳон анҷом диҳем",- гуфт Чаба Короши дар чорабинии солонаи сатҳи баланд бахшида ба Ҳадафҳои Рушди Устувор.

Раиси Маҷмаи умумии СММ зикр кард, ки пандемияи COVID-19 рушди ҷаҳониро суст кардааст, аммо ин "баҳонаи беамалӣ" шуда наметавонад. Ҳоло мо бояд суръатеро, ки бар асари пандемия ва беамалии худ аз даст додаем, дубора барқарор намоем.