Хабарҳо
ҶОМИ ПРЕЗИДЕНТИ ТОҶИКИСТОН
Дар рӯзи аввал киҳо ғолиб омаданд?
Дар рӯзи якуми IX мусобиқаи байналмилалии Ҷоми Президенти Тоҷикистон (19 – 20 сентябр, Хуҷанд) ғолибон ва ҷоизадорони вазнҳои – 57 кг ва – 63 кг миёни бонувон ва – 66 кг ва – 81 кг байни мардон муайян гардиданд.
Бар пояи иттилои масъулони мусобиқа, миёни бонувон дар вазни - 57 кг мақоми аввалро Шоҳида Қаландарова (Тоҷикистон) ишғол намуд. Аҳлия Муминова ва Фазилат Гулбоева (Тоҷикистон) ду ҷойи ифтихории дигарро гирифтанд. Нишони тиллои вазни-63 кг насиби Мавлуда Одинаева (Тоҷикистон) гашт. Зинаҳои дуюму сеюмро Ҷонона Назарова ва Рӯзафсун Бекназарова (Тоҷикистон) ишғол карданд.
Муллораҷаб Халифаев (Тоҷикистон) тавонист бо шикаст додани рақибонаш дар вазни - 66 кг барандаи ҷом гардад. Медали нуқраро Обид Ҷебов (Россия) ва нишонҳои биринҷиро Дилшодбек Юлдошев ва Артём Штурбабин (Ӯзбекистон) ба даст оварданд.
Дар қувваозмоии финалии вазни - 81 кг паҳлавони тоҷик Ҳамроз Раҷабов бар гӯштигири эронӣ Меҳдӣ Фатҳӣ пирӯз шуда, ғолиби мусобиқа гашт. Мақоми сеюмро Рамазон Аллабердиев (Ӯзбекистон) ва Раҳматуллобек Фарҳодов (Тоҷикистон) касб карданд. Дар рӯзи ниҳоӣ зӯрозмоиҳои вазнҳои - 90 кг, - 100 кг ва +100кг миёни мардон сурат мегирад.
«KING’S CUP 2022»
Тоҷикистон омодагии ҷиддӣ мебинад
Тими миллии Тоҷикистон оид ба футбол зери роҳбарии мутахассиси хорватӣ Петр Сегрт аввалин тамрини худро дар шаҳри Чианг Майи Таиланд, ки барои ширкат дар Мусобиқаи байналмилалии «King’s Cup 2022» (22–25 сентябр, Чианг Май, Таиланд) ҳузур доранд, баргузор намуд.
Тибқи иттилои ФФТ, мунтахаби мо дар даври нимниҳоии мусобиқа бо дастаи Тринидад ва Тобаго ва мизбонон - Тайланд бо Малайзия неру месанҷад. Қувваозмоиҳо 22 сентябр доир мегарданд.
Бозии финалӣ ва барои ишғоли зинаи сеюм 25 сентябр сурат мегирад.
Ёдовар мешавем, ки ситоди мураббиён ба ҳайат 23 бозигар (3 дарвозабон, 9 ҳимоятгар, 7 нимҳимоятгар ва 4 ҳамлагар), аз ҷумла 11 легионерро даъват намуданд.
Маҳмуд БАҲРОМ, шореҳи варзиш
Баёни ақида (0) Санаи нашр: №: Мутолиа карданд: 5038