19-уми сентябри соли 2022 дар ҳошияи «Ҳафтаи сатҳи баланд»-и иҷлосияи 77-уми Маҷмааи умумии Созмони Милали Муттаҳид дар шаҳри Ню-Йорк, вохӯрии вазири корҳои хориҷии Ҷумҳурии Тоҷикистон Сироҷиддин Муҳриддин бо Дабири кулли СММ Антониу Гутерриш доир гардид. Дар ин бора аз Вазорати корҳои хориҷӣ хабар доданд. 

Зимни мулоқот Сироҷиддин Муҳриддин ба Дабири кулли СММ оид ба рӯйдодҳои ахир дар марзи Тоҷикистону Қирғизистон ба таври муфассал иттилоъ дода, маводҳои марбута, аз ҷумла навор ва аксҳоеро, ки далели ҳамлаи низомии Қирғизистонро собит мекунанд, манзур сохт.

Вазири корҳои хориҷӣ зикр кард, ки Тоҷикистон ҳеҷ гоҳ тарафдори ҳалли низомии масъалаи марз бо Қирғизистон нест ва ҳамеша хостори равиши сиёсиву дипломатӣ мебошад.

Инчунин, ҷонибҳо масъалаҳои мубрами ҳамкорӣ миёни Тоҷикистон ва Созмони Милали Муттаҳид, бавижа дар самти рушди устувори иқтисодиву иҷтимоӣ, тағйирёбии иқлим ва обу энергетикаро матраҳ намуданд.

Мусоҳибон, ҳамчунин, ба масъалаҳои амнияти минтақа, бахусус вазъи Афғонистон ва ба чораҳои андешидаи Тоҷикистон дар самти расондани ёрии башардӯстона, таваҷҷуҳ зоҳир карданд.

Дабири кулли СММ аз ташаббусҳои ҷаҳонии Тоҷикистон истиқбол гирифта, баҳри ҳамкории фарогир омодагии Созмонро иброз дошт.

 

 

Бар асари даргириҳо дар марз 41 нафар кушта шуд

Дар Вазорати корҳои хориҷии мамлакат оид ба ҳодисаҳои  фоҷиабори 14 – 18 сентябри соли 2022 дар марзи Тоҷикистону Қирғизистон брифинг  баргузор гардид. Муовини вазири корҳои хориҷӣ Содиқ Имомӣ аз кушта шудани 41 нафар бар асари даргириҳои мусаллаҳона хабар дод, – иттилоъ дод АМИТ «Ховар».

Тибқи иттилои маркази матбуоти Вазорат, муовини вазири корҳои хориҷӣ ба иштирокчиёни брифинг – намояндагони корпусҳои дипломатии муқими Тоҷикистон ва васоити ахбори оммаи ватанию хориҷӣ доир ба хронологияи рӯйдодҳои рӯзҳои охир ва тадбирҳои андешидаи ҷониби Тоҷикистон ҷиҳати ба эътидол овардани вазъ дар минтақаи сарҳадӣ маълумоти муфассал дод.

Ба Созмони Милали Муттаҳид ва ниҳодҳои он ҷиҳати омодагӣ барои расондани ёрии ҳамаҷониба ба Тоҷикистон, ҳамчунин, ба хонавода ва наздикони фавтидагон ва осебдидагон миннатдорӣ баён шуд.

 

 

Тоҷикистон асирони қирғизро раҳо кард

Вазорати корҳои дохилии Ҷумҳурии Тоҷикистон хабар дод, ки баъди ба имзо расидани созиш миёни раҳбарони кумитаҳои давлатии амнияти миллии Тоҷикистон ва Қирғизистон, чор марзбони боздоштаи кишвари ҳамсоя озод шуданд. 

Дар шарҳи хабари Вазорат омадааст, ки онҳо “аз рӯи принсипи башардӯстона, ҳусни ҳамҷаворӣ ва ҳамсоягии нек шоми 19 сентябри соли 2022, соати 19:00 бо вақти Душанбе ба ҷониби Қирғизистон супурда шуданд”.

Зикр мегардад, ки низомиёни дастгиршудаи қирғиз, тибқи талаботи меъёрҳои қонунгузории байналмилалӣ, бо ёрии тиббӣ, хӯрок ва шароити маишӣ таъмин гардида буданд.