IX мусобиқаи байналмилалӣ бо чӣ натиҷаҳо анҷом ёфт? 

 

Дар рӯзи охири IX мусобиқаи байналмилалии Ҷоми Президенти Тоҷикистон (19 – 20 сентябр, Хуҷанд) ғолибон ва ҷоизадорони вазнҳои -90 кг, -100 кг ва +100кг миёни мардон муайян гардиданд. 

Тибқи иттилои масъулони мусобиқа, дар зӯрозмоии финалии вазни то 90 кг Ҳақназар Назаров (Тоҷикистон) бар варзишгари дигари кишвар Кароматулло Ҳакимов пирӯз гашт. Зинаи сеюмро Қосим Бағҷеғӣ (Эрон) ва Эрмахан Анурбеков (Қазоқистон) ишғол карданд. 

Дар вазни -100 кг Бекарис Садукас (Қазоқистон)  ғолиб омад. Ҷойҳои дуюм ва сеюмро мутаносибан Фирдавс Насимов, Исроил Раҳимов ва Раҳматулло Мирзоев ((Тоҷикистон) гирифтанд.

Миёни сангинвазнҳо Мансур Раҳмон (Тоҷикистон) барандаи ҷом гардид. Варзишгари дигари мо Фарзин Ҳусейнов барандаи медали нуқра шуд. Мақоми сеюмро Жамбул Тургуналиев (Қазоқистон) ва Дадахон Қурбоналиев (Тоҷикистон) касб карданд.  

Ёдовар мешавем, ки дар рӯзи аввали мусобиқа паҳлавонони кишвар Шоҳида Қаландарова (-57 кг), Мавлуда Одинаева (-63 кг) Муллораҷаб Халифаев (- 66 кг), Ҳамроз Раҷабов (-81 кг) барандаи Ҷоми Президенти Тоҷикистон шуданд.

 

 

 

 

ФУТЗАЛ

Мунтахаби мо дар бозии санҷишӣ ғолиб омад

 

Дар доираи омодагӣ ба марҳилаи ниҳоии Ҷоми Осиё – 2022 мунтахаби футзали Тоҷикистон таҳти роҳбарии Пайрав Воҳидов дар ҷамъомади таълимиву тамринӣ дар Амороти Муттаҳидаи Араб нахустин бозии санҷиширо анҷом дод.

Дар бозии дӯстона футзалбозони мо бар бошгоҳи «Малиҳа», ки дар чемпионати АМА баромад мекунад, бо ҳисоби 4:1 ғалаба карданд. 

Голҳоро аз ҳайати дастаи мо Идрис Ёров (ду гол), Файзалӣ Сардоров ва Дилшод Саломов заданд.

Бояд гуфт, ки дар Ҷоми Осиё – 2022 (27 сентябр – 8 октябр, Кувайт) мунтахаби Тоҷикистон дар гурӯҳи «В» бо дастаҳои Баҳрайн (27 сентябр), Ӯзбекистон (29 сентябр) ва Туркманистон (1 октябр) мебошанд.

 

Маҳмуд БАҲРОМ, шореҳи варзиш