Lenta.ru. Бино ба иттилои хадамоти матбуоти Кремл, Президенти Россия Владимир Путин зимни суҳбати телефонӣ бо валиаҳди Арабистони Саудӣ Муҳаммад бин Салмон оли Сауд масъалаи ҳамкорӣ дар СҲШ-ро баррасӣ кард.  

Мусоҳибон оид ба додани мақоми шарики муколама ба Арабистони Саудӣ дар Созмони ҳамкории Шанхай, ки зимни нишасти ахир дар шаҳри Самарқанд қабул шуд, мубодилаи афкор намуданд. 

Муҳаммад бин Салмон нақши афзояндаи СҲШ-ро дар муносибатҳои байналмилалӣ таъкид карда, ҳамчунин, омодагии Ар-Риёзро барои иштироки чашмрас дар фаъолияти ин созмон изҳор дошт.

 

 

 

Даъвати Чин ва Ҳиндустон дар Шурои амнияти СММ 

INTERFAX.RU. Ван И, вазири корҳои хориҷии Чин, дар ҷаласаи Шурои амнияти СММ гуфт, ки Пекин бозгашти Москва ва Киевро ба сари мизи музокирот аз масъалаҳои авлавиятнок медонад.

"Мо бояд ба муколама ва музокира пойбанд бошем. Афзалияти асосӣ барои ҷонибҳо азсаргирии музокирот бе шартҳои пешакӣ ва пойбандӣ ба муколама бидуни пешгӯии натиҷаҳост", - иброз намуд Ван И. 

 Ӯ, ҳамчунин, ҷонибҳоро даъват кард, ки аз муташанниҷ  кардани  вазъ худдорӣ намоянд ва аз ҷомеаи байналмилалӣ хоҳиш кард, то ба мусолиҳа расондани тарафҳои даргир нақши созгор гузоранд.

Субраманям Ҷайшанкар, вазири корҳои хориҷии Ҳиндустон низ, изҳори итминон кард, ки буҳрони Украина аз тариқи муколама ҳал мешавад.

 

 

Петер Сийярто:  “Будапешт пайгирӣ кардани бастаи нави таҳримҳои зидди Россияро беҳуда мехонад”

RT. Петер Сийярто, вазири корҳои хориҷии Маҷористон, дар пайи мулоқот бо ҳамтои русаш Сергей Лавров изҳор дошт, ки Маҷористон пайгирӣ намудани бастаи нави таҳримҳои зидди Россияро беҳуда мехонад. 

«Мавқеи мо хеле равшан аст. Мо ҳеҷ гуна далелҳои оқилонаро барои татбиқи бастаи нави таҳримҳо намебинем, бахусус он гоҳ, ки сухан дар бораи энергетика меравад”,- иброз дошт Сийярто.  

Ӯ таъкид кард, ки ҷониби Маҷористон ба маҳдудиятҳои эҳтимолии нав алайҳи Россия ризоят намедиҳад, агар онҳо ба манофеи миллии ин кишвар мухолиф бошанд. Ман фикр мекунам, ки ин комилан хилофи манфиатҳои Аврупо ва халқҳои он мебошад.

Вазири корҳои хориҷии Маҷористон, ҳамчунин, иброз дошт, ки иқтисоди Аврупо рӯ ба таназзул ниҳодааст.

Тавре Сарвазири Маҷористон Виктор Орбан қаблан гуфта буд, дар сурати лаҳви таҳримҳо алайҳи Россия, иқтисоди Аврупо метавонад аз таназзул раҳо ёфта, барқарор шавад.

 

 

Эрдоган ният дорад бо Путин ва Зеленский суҳбати телефонӣ анҷом диҳад

Известия. Тавре Роҳбари Туркия Реҷеп Тайип Эрдоган 22 сентябр гуфт, ӯ мехоҳад пас аз бозгашт аз Иёлоти Муттаҳидаи Амрико, ки ҳоло дар Маҷмаи умумии СММ ширкат дорад, бо Президенти Россия Владимир Путин ва Президенти Украина Владимир Зеленский суҳбати телефонӣ анҷом диҳад. 

Ба гуфтаи ӯ, роҳбарони ҷаҳон бояд бо Сарвари Россия барои “боз кардани дарҳои сулҳу субот” суҳбат намоянд ва илова кард, ки СММ, мутаассифона, натавонист ба низоъ дар Украина хотима бахшад, хунрезиро қатъ ва роҳи ҳалли буҳрони энергетикӣ ва ғизоро пайдо намояд.