Дар сарҳади ду давлат суботу оромӣ ва ҳамдигарфаҳмӣ барқарор хоҳад шуд 

Кумитаҳои давлатии амнияти миллии Ҷумҳурии Тоҷикистон ва Ҷумҳурии Қирғизистон протоколи қатъи муноқишаи марзиро ба имзо расонданд. Дар ин бора ба АМИТ «Ховар» дар маркази матбуоти Қӯшунҳои сарҳадии Кумитаи давлатии амнияти миллии Ҷумҳурии Тоҷикистон хабар доданд.

Раиси Кумитаи давлатии амнияти миллӣ Саймумин Ятимов ва раиси Кумитаи давлатии амнияти миллии Қирғизистон Қамчибек Ташиев дар нуқтаи гузаргоҳи сарҳадии «Қизил-Бел» гуфтушунид анҷом дода, оид ба қатъи низоъ дар сарҳади ду кишвар протокол ба имзо расонданд.

Ҷонибҳо изҳори умед намуданд, ки бандҳои созишномаи имзошуда иҷро хоҳанд шуд ва дар сарҳади ду давлат суботу оромӣ ва ҳамдигарфаҳмии комил барқарор мегардад.

 

Мулоқоти вазирони корҳои хориҷии Тоҷикистон ва Қирғизистон бо муовини Дабири кулли СММ 

Дар Ню-Йорк мулоқоти вазирони корҳои хориҷии Ҷумҳурии Тоҷикистон ва Ҷумҳурии Қирғизистон Сироҷиддин Муҳриддин ва Ҷеенбек Кулубоев ва муовини Дабири кулли СММ оид ба масъалаҳои сиёсӣ ва бунёди сулҳ Розмари Дикарло баргузор гардид.  Дар ин бора ба АМИТ «Ховар» аз Вазорати корҳои хориҷӣ хабар доданд.

Иштирокчиёни мулоқот доир ба вазъ дар марзи давлатии Тоҷикистону Қирғизистон табодули афкор намуда, омодагии худро барои идомаи музокирот оид ба ҳалли мусолиматомези минбаъда изҳор карданд.

Илова бар ин, ҷонибҳо аҳамияти иҷрои созишҳоро дар чаҳорчӯбаи Протоколи баимзорасида оид ба ҳалли муноқишаи мусаллаҳона дар манотиқи марзии Тоҷикистон ва Қирғизистон аз 19 сентябри соли 2022 зикр намуданд.

 

Тоҷикистон бо Венесуэла, Сербия ва Марокаш созишнома имзо кард

Дар ҳошияи иҷлосияи 77-уми Маҷмаи умумии СММ дар Ню-Йорк вазири корҳои хориҷии Ҷумҳурии Тоҷикистон Сироҷиддин Муҳриддин бо вазирони корҳои хориҷии Ҷумҳурии Боливариании Венесуэла Карлос Фария, Ҷумҳурии Сербия Никола Селакович ва Подшоҳии Марокаш Носир Бурита мулоқот намуд. Дар ин бора Вазорати корҳои хориҷии мамлакат хабар дод.

Дар вохӯрӣ Созишнома оид ба лағви раводид барои дорандагони шиносномаҳои дипломатӣ ва хизматӣ байни Ҳукумати Ҷумҳурии Тоҷикистон ва Ҳукумати Ҷумҳурии Боливариании Венесуэла, Созишномаи байни Ҳукумати Ҷумҳурии Тоҷикистон ва Ҳукумати Ҷумҳурии Сербия дар бораи мутақобилан бекор намудани талаботи раводид барои дорандагони шиносномаҳои дипломатӣ ва хизматӣ, инчунин, Созишнома байни Ҳукумати Ҷумҳурии Тоҷикистон ва Ҳукумати Подшоҳии Марокаш оид ба лағви раводид барои дорандагони шиносномаҳои дипломатӣ ва хидматӣ ба имзо расид.