Хабарҳо
НОҲИЯИ ФИРДАВСӢ. МУҚОВИМАТ БА КОРРУПСИЯ МИЁНИ СОКИНОН ТАРҒИБ МЕГАРДАД
Мубориза бар зидди коррупсия дар сиёсати давлатии Ҷумҳурии Тоҷикистон ҳамеша яке аз масъалаҳои меҳварӣ буда, муқовимат ба ин зуҳуроти номатлуб ва пешгирии омилҳои ба он мусоидаткунанда сол ба сол пурзӯртар мешаванд. Ин дар ҳолест, ки кишвари мо аз рӯзҳои нахустини ба даст овардани Истиқлоли давлатӣ мубориза бо коррупсияро ҳамчун самти афзалиятноки сиёсати давлатӣ қарор дода, ба ташаккули заминаҳои ҳуқуқиву сохторӣ ва таҳкими ҳамкориҳои байналмилалӣ дар ин самт оғоз намуд.
Дар ин бора Шодком Турсунзода, сардори шуъбаи муқовимат ба коррупсияи раёсати Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар шаҳри Душанбе, зимни врхӯрӣ бо аҳли ҷамоатчии ноҳияи Фирдавсӣ иброз дошт.
Ӯ вобаста ба риояи талаботи Қонуни Ҷумҳурии Тоҷикистон «Дар бораи муқовимат ба коррупсия», инчунин, сабабҳои пайдоиш ва пешгирии коррупсияро шарҳ дода, чунин гуфт: «Коррупсия дар баробари дигар хатарҳои ҷаҳонӣ, ба монанди терроризм, экстремизм, гардиши ғайриқонунии маводи мухаддир, яке аз масъалаҳои хатарзои глобалӣ дар ҷомеа ба ҳисоб рафта, содиршавии ҷиноятҳо дар ин самт ба сатҳи иқтисодию иҷтимоии ҷомеа ва мафкураи инсоният таъсири манфӣ мерасонад».
Дар чорабинӣ, ҳамчунин, Шарофиддин Давлатзода, ёрдамчии калони прокурори ноҳияи Фирдавсӣ, Сатрина Одилбекиён, корманди Агентии назорати маводи нашъаовари назди Президенти Ҷумҳурии Тоҷикистон, Меҳриддин Исмонзода, мудири бахши дин, танзими анъана ва ҷашну маросими МИҲД-и ноҳияи Фирдавсӣ, доир ба самтҳои худ суханронӣ намуданд. Дар охир аз тарафи аҳли нишаст чунин вохӯриҳоро яке аз воситаҳои пешгирии ҷинояту ҷинояткорӣ ва баланд бардоштани савияи дониши ҳуқуқии шаҳрвандон арзёби карданд.
С. МАҶИДЗОДА,котиби комиссияи ҷамъиятӣ оид ба пешгирии коррупсия дар назди МИҲД-и ноҳияи Фирдавсии шаҳри Душанбе
Баёни ақида (0) Санаи нашр: №: Мутолиа карданд: 3254