Дар васоити ахбори оммаи ҷумҳурӣ рӯзноманигорони бешуморе заҳмат кашида, ҳамарӯза хабару мақолаҳоро оид ба рӯйдоду воқеаҳо ва ҳодисаю навгониҳо ба мардуми кишвар мерасонанд. Афроде низ ҳастанд, ки фаъолияту эҷоди худро ба адабиёт бахшида, асарҳои пурмазмун меофаранд. Алӣ Ҷӯра, муҳаррири масъули ҳафтаномаи «Минбари халқ», яке аз онҳост. Номбурда ба наздикӣ тавассути нашриёти «Шарқи озод» асари дуюминашро бо номи «Тулуи беғуруб» пешкаши ҳаводорони каломи бадеъ гардонд.

 

Бояд гуфт, ки пешгуфтори ин асарро Нависандаи халқии Тоҷикистон Кароматулло Мирзо навиштааст.

Асар аз се қисм иборат аст. Қисми якумаш «Эссе» ном гирифтааст, ки дар он 8 хотираи адиб гирд оварда шудааст. Мавзуи эссеҳояш аз ҳаёти шахсони алоҳидаи номдор, паҳлавонони овозадор иборатанд, ки хонанда зимни мутолиаи онҳо бо далерию мардонагии қаҳрамонҳо шинос мешавад. Қобили зикр аст, ки муаллиф бо усули ба худ хос ба майдони адабиёт қадам мондааст. Масалан, дар эссеи «Рустоӣ» бо услуби саволу ҷавоби бибӣ бо набера як мавзуи муҳими иҷтимоӣ, тарҷумаиҳолӣ ҳаллу фасл шудааст. 

Қисми дуюми китоб «Раҳовард» ном гирифта, 6 сафару саёҳатҳои муаллифро ба гӯшаю канори Ватани азиз ва минтақаҳои гуногуни ҷаҳон дар бар мегирад.

Адиб ба кадом гӯшаву канори ободу шукуфони кишварҳои тараққикарда рафта, аз комёбиву дастовардҳои онҳо ба ваҷд омада бошад ҳам, вале сарзамини роҳатфазои Ватани худро аз ҳама боло медонад. Мана ба ин пораи қироаткардаи Алӣ Ҷӯра таваҷҷуҳ намоед: «Аммо пораи нони гандумии дар танӯр пухташудаву косаи оби мусаффои рӯди зодгоҳ лаззати дигар доранд»

Дар қисми сеюм ва асосии асар ҳикояҳо гирд оварда шудаанд ва онҳо паҳлуҳои алоҳидаи зиндагии деҳотиёнро фаро гирифтаанд.

Бояд тазаккур дод, ки Алӣ Ҷӯра ҳамчун журналисти собиқадору варзида кӯшидааст то забони эҷодиёташ сода, хонданбоб, равон ва барои ҳама фаҳмо бошаду дар баробари  ин, хонанда аз он як ҷаҳон ҳаловат мебарад.

Мазмуни асосии асар тасвири хислатҳои неки инсонӣ, талош барои ҳақиқату адолат, мустаҳкам намудани дӯстиву рафоқату ваҳдат, ҷонибдорӣ аз сиёсати созандаву бунёдкоронаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон баҳри ободу зебо гардондани кишвари азиз мебошад.

Аз мутолиаи китоби «Тулуи беғуруб»-и Алӣ Ҷӯра бармеояд, ки ҳамаи нигоштаҳои ӯ – эссе, хотира ва ҳикояҳо моли адабиёт мебошанд. Дар ин роҳи мушкил ба адиб барор мехоҳем.

 

Зариф ҒУЛОМ, адиб