Дар Бонки миллии Тоҷикистон вохӯрии муовини якуми раиси Бонки миллии Тоҷикистон Фирдавс Толибзода бо директори Маркази минтақавии рушди иқтидори ХБА барои давлатҳои Кавказ, Осиёи Марказӣ ва Муғулистон Норберт Функе баргузор гардид, ки дар доираи он тавсеа ва рушди минбаъдаи ҳамкориҳо мавриди баррасӣ қарор гирифтанд.

 

Фирдавс Толибзода саҳми Хазинаи байналмилалии асъорро дар ташаккули институтҳо ва рушди иқтидори омилҳои инсонӣ дар бахши молиявӣ муҳим дониста,  барои ҳамкориҳои доимӣ ва дастгирии ХБА ба низоми бонкӣ ва дар маҷмуъ иқтисодиёти миллии мамлакат изҳори сипос карда, аз нақши марказ ва фаъолгардии он дар давраи ҳассос ва мушкили пандемияи COVID – 19 сухан ронда, зикр намуд, ки он  барои бонкҳои марказӣ ба ҳайси майдони муколама дар муҳокимаи масъалаҳои муҳим  ҷиҳати қабули қарорҳо ва чораҳои ҷавобӣ дар самти танзим ва назорати бонкӣ, омодагӣ ба ҳолатҳои буҳронӣ ва идоракунӣ дар шароити буҳронӣ, таъмини амнияти иттилоотӣ дар фаъолияти фосилавӣ ва амсоли инҳо хизмат менамояд. Маҳз фаъолияти ҳамин марказ дар даврони мураккаби пандемия имкон фароҳам овард, ки беш аз 260 нафар мутахассиси Бонки миллии Тоҷикистон дар чорабиниҳои омӯзишӣ, аз ҷумла  семинар, вебинар, мизи гирд ва муҳокимарониҳо ба таври фосилавӣ ширкат варзида, донишу малакаи худро такмил диҳанд.

Ҳамзамон, муовини якуми раиси Бонки миллии Тоҷикистон барои ҳамкории оянда бо Маркази минтақавии рушди иқтидори ХБА дар самти танзим ва назорати низоми бонкӣ бо истифодаи таҷрибаи байналмилалӣ, бахши сиёсати пулию қарзӣ, рушди низоми пардохт, заминаи меъёрии ҳуқуқӣ, аудити дохилӣ, омор ва тавозуни пардохт, танзиму назорати суғуртавӣ, таҳияи низоми муосири идоракунии хавфҳои амалиётӣ ва комплаенс бо ҷалби ёрии техникӣ изҳори назар кард. 

Норберт Функе изҳор намуд, ки Маркази минтақавии рушди иқтидори ХБА бо 9 кишвар, аз ҷумла Ҷумҳурии Тоҷикистон ҳамкории мутақобиларо ба роҳ мондааст. Ӯ барои густариши ҳамкориҳо бо Бонки миллии Тоҷикистон ҷиҳати суботи молиявӣ, пешбурди сиёсати самараноки макропруденсиалӣ, идоракунии хавфҳо, танзиму назорати бонкӣ, ки барои суботи молиявӣ ва рушди иқтисоди кишвар заминаи мусоид фароҳам меоварад, омодагии хешро иброз дошт. 

 

Муҳаммадзоиршо ШАРИФЗОДА, “Ҷумҳурият”