Кумакҳои моддии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба зарардидагони даргириҳои марзӣ дар ноҳияи Бобоҷон Ғафуров дастрас гардиданд. Дар ин бора хадамоти матбуоти раиси вилоят хабар дод.

Раиси вилояти Суғд Раҷаббой Аҳмадзода дар суҳбат бо сокинони зарардида таъкид кард, ки аз ҷониби Ҳукумати мамлакат ба ҳар оилаи зарардида барои барқарор кардани хонаҳои истиқоматӣ ба миқдори зарурӣ семент, шифер, арматура, хишт, тахта ва дигар масолеҳи сохтмонӣ ҷудо гардид. Манзилҳои истиқоматии шаҳрвандон дар кӯтоҳтарин  муддат  бунёд ва бо тамоми ҷиҳози зарурӣ таъмин хоҳанд шуд.

Барои зимистонгузаронии оилаҳои зарардида бошад, орд, биринҷ, равған, пиёз, сабзӣ,  картошка, макарон ва шакар дастрас мешавад.

Сокинон аз дастгириҳои пайвастаи Пешвои миллат муҳтарам Эмомалӣ Раҳмон изҳори сипос карда, иброз доштанд, ки ғамхориҳои Ҳукумати мамлакат боиси руҳбаландии онҳо мегардад.

 

 

 

Шумораи вижаи маҷаллаи “Business Central Asia” оид ба Тоҷикистон

Ба ифтихори солгарди Истиқлоли давлатии Ҷумҳурии Тоҷикистон дар Деҳлии Нав маҷаллаи “Business Central Asia” бо таваҷҷуҳи хос ба Тоҷикистон ба нашр расид,- хабар дод Вазорати корҳои хориҷии кишвар.

Дар ин шумора паёми табрикотии Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба муносибати 31-умин солгарди Истиқлоли давлатӣ, мубодилаи табрикномаҳои роҳбарони ду кишвар ба муносибати рӯзҳои миллӣ, матни табрикоти вазирони корҳои хориҷии Тоҷикистону Ҳиндустон ба муносибати 30-солагии барқарор кардани муносибатҳои дипломатӣ, мақолаи вазири саноат ва технологияҳои нави Тоҷикистон бо номи “Ташвиқи рушди саноат дар Тоҷикистон”, мақолаи сафири фавқулода ва мухтори Ҷумҳурии Тоҷикистон дар Ҳиндустон таҳти унвони “30 соли ҳамкориҳои мутақобилан судманд” ҷой дода шудаанд.

Ҳамзамон, дар маҷалла мақолаҳои алоҳида доир ба аҳамияти таърихии иҷлосияи XVI Шурои Олии Тоҷикистон, робитаҳои таърихию фарҳангии Тоҷикистону Ҳиндустон, нигораҳои Осорхонаи миллии Тоҷикистон ва ғайра ба табъ расидаанд.

 

 

 

Омодагӣ ба даъвати тирамоҳӣ

Аз якуми октябри соли 2022 даъвати тирамоҳии шаҳрвандон ба хизмати ҳатмии ҳарбӣ оғоз мегардад. Ба ин муносибат, бо иштироки масъулони мақомоти вобастаи давлатии даъват, ҳайатҳои роҳбариву фармондеҳии Вазорати мудофиа, комиссарони ҳарбии вилоятҳо ва шаҳру ноҳияҳои мамлакат ҷамъомаду чорабиниҳои гуногуни пешаздаъватӣ баргузор гардиданд.

Ба иттилои Вазорати мудофиа, дар ҷаласае, ки бо иштироки вазири мудофиа Шералӣ Мирзо доир шуд, оид ба дастуру супоришҳои Сарфармондеҳи Олии Қувваҳои Мусаллаҳ муҳтарам Эмомалӣ Раҳмон таъкид гашт, ки вазъи ноустувору зудтағйирёбандаи ҷаҳони муосир аз ҳар як хизматчии ҳарбӣ омодабошии доимии ҷангӣ ва масъулияти баланду муносибати ҷиддиро дар самти иҷрои вазифаву уҳдадориҳои хизматӣ тақозо менамояд. Баланд намудани иқтидори мудофиавии кишвар, пеш аз ҳама, ба таҳкиму тақвияти тамоми самту соҳаҳои фаъолияти Қувваҳои Мусаллаҳ вобастагӣ дорад.

Супориши қатъӣ дода шуд, ки масъулони ин чорабинии муҳими сиёсӣ ҳамкориро бо мардум боз ҳам ҷоннок намуда, ба масоили ташкилу ба роҳ мондани сифати даъват диққати аввалиндараҷа диҳанд ва дар ҳамоҳангӣ бо мақомоти иҷроияи ҳокимияти давлатии шаҳру ноҳияҳо, тамоми шароити заруриро барои ҳайати комиссияҳои даъватӣ муҳайё созанд. 

 

 

Форуми байналмилалии дӯстии халқҳои Чин ва Осиёи Марказӣ

Дар Ҷумҳурии Мардумии Чин бахшида ба дӯстии халқҳои Чин ва Осиёи Марказӣ Форуми байналмилалӣ баргузор гардид. Дар он муовини Раиси Маҷлиси намояндагони Маҷлиси Олӣ Дилрабо Мансурӣ бо реҷаи фосилавӣ иштирок ва суханронӣ намуд.

Тавре АМИТ «Ховар» хабар дод, Дилрабо Мансурӣ иброз дошт, ки таҳкими дӯстии анъанавӣ ва дастгирии ҳамдигар, рушди муносибатҳои ҳамкорӣ дар самтҳои гуногун, андешидани тадбирҳои иловагӣ ҷиҳати тавсеаи тиҷорат ва афзоиши ҳаҷми муомилоти мол, фароҳам овардани шароити зарурӣ барои ҷалби фаъолонаи сармоягузорӣ ҷиҳати татбиқи лоиҳаҳои иқтисодии мутақобилан судманди минтақавӣ, аз ҷумла дар заминаи ташаббуси “Як камарбанд, як роҳ”, аз вазифаҳои асосии сиғаи Осиёи Марказӣ – Чин мебошанд.

Тоҷикистон ва Чин дар соҳаи амният, аз ҷумла мубориза бо терроризм, ифротгароӣ, сепаратизм ва дигар ҷиноятҳои муташаккили фаромиллӣ, ба натиҷаҳои судманд ноил гардидаанд.