Бо ташаббуси Муассисаи давлатии “Осорхонаи миллӣ”-и Дастгоҳи иҷроияи Президенти Ҷумҳурии Тоҷикистон 20 сентябри соли равон дар Осорхонаи таърихии вилояти Суғд  шакли хурди намоиши “Тоҷикистон – кишвари дарёҳои тиллоӣ” ифтитоҳ гардид.

Зимни кушодашавии намоиш директори Муассисаи давлатии “Осорхонаи миллӣ” Иброҳимзода Зафаршо Сафо зикр кард, ки намоишгоҳи нигораҳои таърихии Тоҷикистон зери унвони “Тоҷикистон – кишвари дарёҳои тиллоӣ” дар Осорхонаи ҳунарҳои осиёии “Гиме”–и шаҳри Париж 13 октябри соли 2021 бо иштироки Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Фаронса муҳтарам Эммануэл Макрон ба шарафи 30-солагии Истиқлоли давлатии Ҷумҳурии Тоҷикистон ва дар остонаи сиюмин солгарди муносибатҳои дипломатии Тоҷикистон ва Фаронса ифтитоҳ гардида, муддати 3 моҳ идома ёфт.

Дар намоиш зиёда аз 100 адад ашёи таърихии марбут ба миллати тоҷик аз Муассисаи давлатии “Осорхонаи миллӣ” ба тамошо гузошта шуд, ки онҳо инъикосгари таърихи беш аз 6 ҳазорсолаи халқи куҳанбунёди тоҷик буда, фарогирандаи ҳазораи IV то мелод ва давра ба давра то асри Х мелодӣ мебошанд.

Зимнан, дар асоси дастури Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон намоиши “Тоҷикистон – кишвари дарёҳои тиллоӣ” баъд аз бозгашт аз Ҷумҳурии Фаронса рӯзи 25 феврали соли 2022 дар Муассисаи давлатии “Осорхонаи миллӣ” ифтитоҳ гардид. 

Ҳадаф аз ташкил ва ифтитоҳи шакли хурди намоиши “Тоҷикистон – кишвари дарёҳои тиллоӣ” дар шакли сайёр дар вилоятҳо ва шаҳру ноҳияҳои Ҷумҳурии Тоҷикистон амалӣ кардани дастуру супоришҳои пайвастаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати ошно намудани қишрҳои гуногуни ҷомеа бо таъриху фарҳанги пурғановати миллати тоҷик мебошад. 

Намоиши “Тоҷикистон – кишвари дарёҳои тиллоӣ” то 30 сентябр идома меёбад. 

 

Нодира ОЛИМОВА, 

корманди Осорхонаи таърихии вилояти Суғд