Шурои собиқадорони ҷангу меҳнати Ҷумҳурии Тоҷикистон соли 1987 дар асоси қарори конференсияи муассисон, ки аксарият вакилони он иштирокчиёни Ҷанги Бузурги Ватании солҳои 1941–1945 буданд, таъсис ёфтааст. Шуруъ аз он сол то инҷониб Шуро барои ҳимояи ҳуқуқу имтиёзҳои собиқадорон ва таъмини зиндагии арзандаи онҳо тамоми тадбирҳоро андешидааст. Ин нуктаро Раҳмат Қудратов, раиси Шуро, дар пленуми тантанавие, ки бахшида ба 35-солагии Шурои собиқадорони ҷангу меҳнати Ҷумҳурии Тоҷикистон баргузор гардид, иброз дошт. 

 

Намояндаи Сафорати Россия дар Тоҷикистон ба фаъолияти пленум баҳои баланд дода, чунин гуфт: «Ҳоло бисёре аз халқҳо хотироти шаҳидони Ҷанги Бузурги Ватаниро фаромӯш карда, ҳатто ба хароб кардани ҳайкалу ёдгориҳои онҳо даст мезананд, ки ин хеле нигаронкунанда мебошад». 

Зикр гашт, ки Шуро барои ҳимояи ҳуқуқ ва имтиёзҳои ҳамаи собиқадорон, баланд бардоштани сатҳи зиндагӣ, ҷалби онҳо ба фаъолияти сиёсӣ, иқтисодӣ, иҷтимоӣ ва фарҳангии мамлакат нақши созгор мегузорад. Ба наслҳои оянда мерос гузоштани таҷрибаи бою рангини ин пирони хирадманд яке аз вазифаҳои муҳим мебошад, зеро корнамоиҳои онҳо барои баланд бардоштани ҳисси ватандӯстии ҷавонон  мусоидат мекунад. 

Котиби масъули Шуро Э. Турсунов гузориш дода, нақша-чорабиниҳои Шурои собиқадорони ҷангу меҳнати Ҷумҳурии Тоҷикистонро оид ба омодагӣ ба Ҷашни 80-солагии Рӯзи Ғалаба дар Ҷанги Бузурги Ватанӣ тасдиқ кард.

Дар охир ба фаъолон ифтихорномаҳои Шуро ва Кумитаи кор бо ҷавонон ва варзиши назди Ҳукумати Ҷумҳурии Тоҷикистон супурда шуд.

 

Дилноза ҲУКМАТУЛЛОЕВА,  «Ҷумҳурият»