Хабарҳо
ҲАМСОЯГИИ НЕК. БОЗДИДИ ҲАЙАТИ КОНИБОДОМ АЗ НОҲИЯИ БЕШАРИҚ
Як ҳайат бо намояндагӣ аз ҳунармандон ва кишоварзони шаҳри Конибодоми вилояти Суғд бо роҳбарии муовини раиси шаҳр Фирдавс Ёдгорӣ аз ноҳияи Бешариқи вилояти Фарғона боздид намуд. Дар ин бора дафтари матбуоти ҳокимияти вилояти Фарғона ба «Ҷумҳурият» хабар дод.
- Ҳадаф аз ин сафар шиносоӣ бо корҳое мебошад, ки дар соҳаи кишоварзӣ ва соҳаҳои дигари ноҳияи Бешариқ анҷом дода мешаванд. Инчунин, дар ҷараёни сафар ҳунармандон ва кишоварзони шаҳри Конибодом ва ноҳияи Бешариқ табодули таҷриба мекунанд, - гуфт Фирдавс Ёдгорӣ.
Меҳмонони тоҷикистонӣ аввал дар семинарҳо оид ба кишти ғаллаи тирамоҳӣ дар хоҷагии фермерии «Азизбек» ва пойгоҳи илмию таҷрибавии «Фарғона» иштирок карданд. Семинарҳо бо риояи ҳусни тафоҳум ва саволу ҷавоб, инчунин баҳсу мунозираҳо баргузор шуданд.
Аъзои ҳайати шаҳри Конибодом аз шифохонаи хусусии “Ихлос мед сервис” ва таҷҳизоти замонавии тиббӣ дидан намуданд, инчунин, бо фаъолияти корхонаи «Бешариқ паранда” ошно гаштанд. Ин корхона ба истеҳсоли тухм ва гӯшти мурғ ихтисос дода шудааст.
Дар охири сафар Фирдавс Ёдгорӣ аз ҳамсояҳои худ даъват намуд, ки ба шаҳри Конибодом ташриф оваранд ва бо фаъолияти корхонаҳои он ва хоҷагиҳои деҳқонӣ ошно шаванд.
Мирасрор АҲРОРОВ, «Ҷумҳурият», шаҳри Тошкент
Баёни ақида (0) Санаи нашр: №: Мутолиа карданд: 4482