Хабарҳо
ҶАЛАСА ОИД БА МАЪРИФАТИ ЭКОЛОГИИ АҲОЛӢ
Таҳти роҳбарии муовини Сарвазири мамлакат Сулаймон Зиёзода дар Китобхонаи миллии Тоҷикистон ҷаласаи Комиссияи байниидоравии давлатӣ оид ба маърифати экологии аҳолӣ баргузор гардид, - хабар дод Кумитаи ҳифзи муҳити зист.
Дар ҷаласа ҳисоботи аъзои комиссия, аз ҷумла раиси Кумитаи ҳифзи муҳити зист Баҳодур Шерализода, муовини якуми вазири маориф ва илм Ҷамшед Ҷуразода ва раисони комиссияҳои минтақавии байниидоравӣ дар назди мақомоти иҷроияи ҳокимияти давлатӣ оид ба иҷрои Барномаи давлатии рушди тарбия ва маърифати экологии аҳолии Ҷумҳурии Тоҷикистон барои солҳои 2021-2025, шунида шуд.
Масълаҳои дахлдор дар самти ҳифзи муҳити зист, баланд бардоштани сатҳи маърифати экологии аҳолӣ, истифодаи оқилонаи замин, сарватҳои табиӣ, беҳдошти ғизои аз ҷиҳати экологӣ солим, таъмини амнияти экологӣ, тозагӣ ва сабзу хуррамгардонӣ дар шаҳру ноҳияҳо ҷиҳати мутобиқшавӣ ба тағйирёбии иқлим, мавриди таваҷҷуҳи масъулон қарор гирифтанд.
ВОХӮРИИ СИРОҶИДДИН МУҲРИДДИН БО ЭРИК ГРИН
Дар шаҳри Вашингтон мулоқоти вазири корҳои хориҷии Ҷумҳурии Тоҷикистон Сироҷиддин Муҳриддин бо ёвари вижаи Президенти ИМА – мудири аршад оид ба Россия ва Осиёи Марказии Шурои амнияти миллӣ Эрик Грин баргузор гардид.
Вазорати корҳои хориҷӣ иттилоъ дод, ки ҷонибҳо роҷеъ ба масъалаҳои амнияти минтақавӣ, рушди муносибатҳо дар чаҳорчӯбаи созмонҳои байналмилалӣ ва дигар масъалаҳои мавриди эҳтимоми тарафайн табодули афкор намуданд.
ТОҶИКДУХТАР ДАР ОЗМУНИ БАЙНАЛМИЛАЛӢ СОҲИБИ ҶОИЗАВУ ДИПЛОМ ГАРДИД
Зодаи Тоҷикистон Аслигул Тиллохонова дар Озмуни байналмилалии забонҳои англисӣ ва арабӣ дар шаҳри Қоҳираи Ҷумҳурии Арабии Миср комёб гардида, соҳиби ҷоиза ва диплом шуд, - хабар медиҳад АМИТ «Ховар».
Чанде қабл тариқи онлайн Озмуни байналмилалии забонҳои англисӣ ва арабӣ баргузор шуд, ки Аслигул Тиллохонова дар он иштирок намуда, сипас ба шаҳри Қоҳираи Ҷумҳурии Арабии Миср даъват шуд. Ӯ дар Донишгоҳи Ал-Азҳар миёни довталабони 43 давлати дунё баромад намуда, соҳиби ҷоиза ва диплом гардид.
Аслигул соли 2017 дар шаҳри Вашингтон низ дар барномаи «Flex» иштирок карда, миёни намояндагони 35 давлат ҷойи 3-юмро соҳиб шуда буд.
Мавсуф хатмкардаи факултаи забони англисии Донишгоҳи давлатии Бохтар ба номи Носири Хусрав мебошад.
ОЗМУНИ «БЕҲТАРИН АКСИ ШАҲРИ ДУШАНБЕ»
КОРМАНДИ «ҶУМҲУРИЯТ» САЗОВОРИ ҶОЙИ АВВАЛ ШУД
Комрон Сафаров, сармутахассиси шуъбаи иттилооти рӯзномаи «Ҷумҳурият», дар озмуни «Беҳтарин акси шаҳри Душанбе», ки аз ҷониби Мақомоти иҷроияи ҳокимияти давлатии пойтахт бахшида ба таҷлили 31-умин солгарди Истиқлоли давлатии Ҷумҳурии Тоҷикистон эълон гашта буд, сазовори ҷойи аввал гардид.
Озмун дар доираи Конфронси илмӣ - амалӣ бахшида ба Рӯзи ҷаҳонии сайёҳӣ дар мавзуи «Душанбе – шаҳри имкониятҳои рушди сайёҳии устувор» бо иштироки доираи васеи меҳмонону иштирокчиён ҷамъбаст шуд.
Тибқи натиҷагирии ҳайати ҳакамон, ҷойи аввал насиби Комрон Сафаров гашт. Ӯ бо Диплом ва туҳфаи арзанда сарфароз шуд.
Баёни ақида (0) Санаи нашр: №: Мутолиа карданд: 2946