Як ташрифи камина бо зарурати кори шахсие ба САҲШ-и вилояти Суғд таассуротамро аз ин ниҳод комилан ба хубӣ тағйир дод. Ба мушоҳида расид, ки давоми рӯз теъдоди муроҷиаткунандагон вобаста ба масоили гуногун: тағйири ному иваз кардани ҳуҷҷат, оид ба ақди никоҳу гирифтани зоднома, оид ба  ҷудошавӣ, аризадиҳӣ ҷиҳати никоҳ ба даҳҳову садҳо мерасад, вале масъулони ин ҷо, шуруъ аз сардори САҲШ-и вилоят Лола Файззода то дигар кормандони шуъбаҳо,  бо ниёзмандон, бешубҳа, дар сатҳи баланди фарҳангӣ муошират мекунанд. 

Аз он ки дар қабулгоҳ одамони зиёди касбу кори гуногун дар навбатанду аз ҳамаи  шаҳру навоҳии вилоят, дурдасттарин деҳот бо муроҷиат омадаанд,  касеро асабӣ намесозад. Сардор  Лола Файззода бо сабуриву таҳаммулу меҳрубонӣ ҳар нафари онҳоро пазироӣ кардаву бо таваҷҷуҳи зиёд арзашонро гӯш мекунаду ҷиҳати баррасӣ  аз  пайи он мешавад. Бо меҳру самимият, бо муҳаббат номи ҳар кормандро ба забон оварда, дидану ҳаллу фасли ҳар муроҷиатро мусоидат мекунаду роҳҳои ҳаллу баррасияшро нишон медиҳад. Давоми чанд бори дигари  ба ин ниҳод омаданам, боре ҳам ба мушоҳида нарасид, ки нафаре аз дуруштии сардору дигар кормандони САҲШ-и вилоят шикоят кунаду аз қабул норизо  рафта бошад. 

Ҳамин  муҳити кориро дар аксари бахшҳои  шаҳру навоҳии вилоят мушоҳида кардан мумкин аст. Албатта,  ин самари кори хуби ташкилӣ, масъулияти баланду  мутобиқ ва ё ҷавобгӯйи  талаботи рӯз асту саҳми муассири  сардори  вилоятии САҲШ  Лола Файззода маҳсуб меёбад. Мехоҳам  барои муҳайё кардани чунин муҳиту фазои солим  дар иртибот ба қабули шаҳрвандону шунидани арзи онҳо сипос гӯяму дар фаъолияти минбаъдаи корашон  муваффақият таманно намоям.   

 

У. ЭРКАЕВ, шаҳри Хуҷанд