Аслигул Тиллохонова, тоҷикдухтари 26-сола, дар Озмуни байналмилалии забони англисӣ ва арабӣ, ки дар Донишгоҳи Ал-Азҳари пойтахти Миср – шаҳри Қоҳира баргузор гардид, байни 43 давлат бо панҷ забон ойину фарҳанг ва расму русуми Тоҷикистонро муаррифӣ намуда, соҳиби ҷоиза ва диплом гардид. 

Аслигул Тиллохонова зодаи яке аз минтақаҳои дурдасти Тоҷикистон, водии Вахон аст. Ӯ ба забономӯзӣ аз хурдӣ шавқи беандоза дошт, аз ин рӯ, баъди хатми мактаби миёна барои касби илм соли 2014 ба факултети филологияи Донишгоҳи миллии Тоҷикистон дохил шуда, ин даргоҳро бомуваффақият хатм кард. Мудом ҷӯёи илму дониш буд ва дар пеши худ ҳадаф гузошт, ки то чанд забони хориҷиро аз худ кунад. Ин буд, ки барои гирифтани маълумоти дуюм ба факултети забони англисии Донишгоҳи давлатии Бохтар ба номи Носири Хусрав дохил шуда, онро низ ба итмом расонд. 

Соли 2017 тариқи барномаи Flex дар Конфронси забондонони дунё (Вашингтон, ИМА) байни 35 давлат мақоми сеюмро гирифт. Аслигул боифтихор аз рафти Конфронс нақл мекунад: «Вақте бори аввал дар Конфронс иштирок кардам, ҳаяҷон вуҷудамро фаро гирифта буд ва аз он метарсидам, ки ба иштибоҳе роҳ надиҳам. Иштирокдорони дигар миллатҳо дар бораи Ватану миллату фарҳангашон бо маҳорати хос сухан мегуфтанд. Ин ҳамаро шунида дар худ ҷуръат пайдо кардам ва тасмим гирифтам, ки бе ҳарос ва як ҳисси баланди милливу хештаншиносӣ Тоҷикистонро муаррифӣ мекунам. Хушбахтона, ҳамон тавре шуд, ки худ мехостам». 

Бояд зикр намуд, ки Аслигул бо 5 забон – англисӣ, русӣ, олмонӣ, арабӣ ва фаронсавӣ расму русуми минтақаҳои Тоҷикистонро муаррифӣ намуд.

Ӯ сафар ба Миср ва иштирок дар Озмуни мазкурро таҳаввулоти бузурге дар зиндагии хеш мешуморад ва аз ин ба баъд мехоҳад ҳарчи бештар дар озмуну конфронсҳои байналмилалӣ ширкат намуда, хештанро дар саҳнаҳои гуногуни рақобат санҷад ва дар ҷодаи касб кардани донишҳои нав обутоб ёбад. 

- Забономӯзиам ҳеҷ гоҳ бо гирифтани ҷоизаву диплом қатъ намегардад, ин ҳоло оғози кор аст. Мақсаду талошам ғолиб омадан набуд, танҳо мехостам дар қатори дигар давлатҳо Тоҷикистонро ба ҷаҳониён муаррифӣ намоям, бар ин ҳадафи хеш ҳам расидам, - гуфт бо ифтихор Аслигул Тиллохонова.

Дар партави таъкидҳои пайвастаи Пешвои миллат муҳтарам Эмомалӣ Раҳмон омӯхтани забонҳо ва ҳарчи бештар рӯ овардан ба илму дониш воситаи беҳтарини муаррифии Тоҷикистон дар арсаи байналмилалист. Президенти кишвар дар ҳар баромаду суханрониҳояшон, аз ҷумла дар мулоқот бо аҳли маорифи пойтахт дар Донишкадаи давлатии забонҳои Тоҷикистон ба номи Сотим Улуғзода (27 сентябри соли 2022), ба зарурати такмили таълими забонҳои хориҷӣ, пеш аз ҳама, русӣ ва англисӣ дар донишгоҳҳои ҷумҳурӣ изҳори назар намуданд, ки он барои рушду оммавигардонии омӯзиши забонҳои хориҷӣ дар мамлакат заминаи боэътимоде хоҳад гузошт ва ба Аслигул монанд ҷавонони зиёде дар оянда Ватанро дар озмунҳои гуногун намояндагӣ хоҳанд кард.

 

Оламбегими НЕКҚАДАМ,  «Ҷумҳурият»