Дар Китобхонаи миллии Тоҷикистон ба хотири гиромидошти устод Рӯдакӣ мизи гирд доир гардид. Дар он асари арзишманди донишманди маъруфи Эрон Сайид Нафисӣ «Муҳити зиндагӣ ва аҳволу ашъори Рӯдакӣ» рӯнамоӣ шуд. Ин асари калонҳаҷм пажӯҳиши бунёдӣ буда, аз 746 саҳифа иборат аст.

Рӯдакишиносӣ реша ба умқи таърих дорад. Дар замони соҳибистиқлолии Тоҷикистон он бештар рушд кард. Бо ибтикори Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар кишвар 22 сентябр Рӯзи Рӯдакӣ эълон гардид. Муовини директори Китобхонаи миллӣ Ҷалолуддин Нурзода таваҷҷуҳи ҳозиронро ба муҳимтарин тадқиқоти Сайид Нафисӣ ҷалб намуда, зикр сохт, ки рӯдакишиносӣ як бахши муҳими таҳқиқу таҳлил гардидааст. 

– Заминаи  тарҳ ва омода намудани ин асари нафиси устод Саид Нафисӣ дар ҷашни бошукӯҳи тамаддуни орёиҳо ва шашумин Анҷумани тоҷикон  ва  форсизабонони  ҷаҳон – «Пайванд» бо илҳом аз суханони Президенти муҳтарами Ҷумҳурии Тоҷикистон Эмомалӣ Раҳмон, ки дар боби мақому ҷойгоҳи Рӯдакӣ ироа фармуданд, гирифта шуд. Ҷаноби Президент, ҳамчунон, аз донишмандони дохилию хориҷӣ даъват ба амал оварданд, то ҷиҳати ҳар  чи  бошукӯҳтар баргузор шудани ин ҷашн дар соли 2008 ва таҳқиқу нашри ашъори Рӯдакӣ саҳми хешро бигузоранд, – гуфт Муҳаммадҷаъфари Ранҷбар, мураттиб ва муҳаррири нашри тоҷикии китоб.

Доктори илми филология, профессор Абдунабӣ Сатторзода ёдовар шуд: «Таърихи ҳазору садсолаи адабиёти тоҷик бо номи бунёдгузори он устод Рӯдакӣ сахт вобаста аст. Рӯдакиро муосирон ва суханварони баъдина бо унвонҳои ифтихории қофиласолори назми форсӣ, соҳибқирони шоирон, султони шоирон, муқаддумушшуаро, одамушшуаро ёд мекунанд. Имрӯз, бегумон, Рӯдакӣ симо ва муаррифгари миллати мост ва пажӯҳиши аҳволу осори ӯ баҳри равшантар кардани таърихи забону адаби мо судманд аст.  Аксари донишмандони дохилу хориҷи кишвар рӯдакишиносиро баробари тоҷикшиносӣ медонанд, ки ҳақ асту рост».

Ҳамчунин, Ортиқи Қодир, Ҳунарпешаи халқии Тоҷикистон, атрофи симои Рӯдакӣ дар саҳнаи театри тоҷик ҳарф зада, аз эҷодиёти чакомасарои аҳди Сомониён шеърҳо қироат намуд.

 

Бузургмеҳри БАҲОДУР, “Ҷумҳурият”