Барномаи GIZ-и кишвари Олмон яке аз шарикони фаъоли рушди мамлакат  маҳсуб меёбад.  Дар доираи ин барнома дар  Вилояти Мухтори Кӯҳистони Бадахшон ҳам чанд сол боз лоиҳаҳои зиёди созандагиву бунёдкорӣ, омӯзиши  мутахассисони самтҳои гуногуни ниёзи истеҳсолоти дохилӣ ва ғайра амалӣ мегарданд. Дар ин бора  ва доир ба дигар паҳлуҳои ҳамкорӣ дар мулоқоти  Мирзонабот Алишер Худобердӣ, раиси вилоят бо  намояндагони шарикони рушд дар ҳайати Енне Шмит - намояндаи Вазорати Федералии ҳамкориҳои  иқтисодӣ ва рушди Олмон, Мартин Лангер - муовини сафири Олмон дар Тоҷикистон, Сабине Олтҳоф - директори GIZ дар Тоҷикистон, Андреаз Шнайдер - намояндаи Бонки Олмон ва Манучеҳр Бақоев – масъули Бонки Олмон дар Тоҷикистон сухан рафт. 

 

Муовини сафири Олмон дар Тоҷикистон ҷаноби Мартин Лангер гуфт, ки ҳадафи сафарашон ба вилоят боздид аз ҷараёни амалишавии лоиҳаҳое, ки дар солҳои охир аз ҷониби    барномаи GIZ-и Ҷумҳурии Федеролии Олмон дар миқёси вилоят рӯйи даст гирифта шудаанд, мебошад.

Зикр гардид, ки дар доираи барномаи мазкур, аллакай, дар заминаи Донишгоҳи Осиёи Марказии шаҳри Хоруғ  маркази рушди соҳибкорӣ ташкил ёфтааст. Он дар тарбияи кадрҳо ва рушди соҳибкорию тиҷорат дар вилоят саҳми босазо дорад. Тибқи ҳамин барнома  дар ноҳияи Роштқалъа нуқтаи ҷамъоварии шир, корхонаи коркарди мӯйина ташкил шуда, муваффақона фаъолият мекунанд. 

Яке аз лоиҳаҳои калонтарини шарикӣ байни Ҳукумати Ҷумҳурии Тоҷикистон ва кишвари Олмон дар бахши энергетика ин бунёди НБО “Себзор” арзёбӣ гардид, ки алъон корҳои сохтмонӣ дар он бомаром идома доранд. Дар заминаи барномаи мазкур, ҳамчунин, дар самти кумак ба муассисаҳои ёрии аввалияи тиббӣ низ корҳои зиёд ба сомон расиданд. Таъкид шуд, ки соли 2018 бо дастури  Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ноҳияи Мурғоб бо дастгирии Ҳукумати Ҷумҳурии Тоҷикистон ва маблағгузории ҷониби Олмон НБО “Тоҷикистон” мавриди истифода қарор гирифт, ки  лоиҳаи дигари муваффақи  ин ҳамкориҳои судманд  мебошад.  

Намояндагони шарикони рушд аз вусъати корҳои сохтмонӣ дар  НБО “Себзор”, таъмини хоҷагиҳое, ки манзили истиқоматӣ ва дигар амволи ғайриманқулашон зери сохтмон монда буд, бо манзилҳои нави истиқоматӣ изҳори хушнудӣ намуданд.  Зикр гардид, ки  барои оғози корҳои бунёдӣ дар сарбанди Неругоҳ тамоми шароитҳо фароҳаманд. Аз ҷумла, хоҷагиҳое, ки  манзилҳои истиқоматиашон зери канал мемонанд, аллакай, ба ҷойи дигар кӯчонда шуданд.  Намояндагони шарикони рушд   мусоидати раиси вилоятро дар ҳалли  мушкилоти пешомада дар самти  барасмиятдарории ҳуҷҷатҳои зарурӣ ҷиҳати сохтмони Муассисаи таҳсилоти миёнаи умумии рақами 18-и деҳаи Барҷангали ноҳияи Роштқалъа бо  мақомотҳои дахлдор  зарур донистанд.    

Раиси Вилояти Мухтори Кӯҳистони Бадахшон Мирзонабот Алишер Худобердӣ меҳмононро ба вилоят хайрамақдам гуфта, барои ҳамкориҳои судманди шарикони рушд ва амалисозии лоиҳаҳои муҳими стратегӣ изҳори миннатдорӣ  намуд. Зикр гардид, ки ҳамкориҳо дар соҳаҳои мухталиф бо кишвари Олмон дар сатҳи баланд ба роҳ монда шуда, сохтмони неругоҳҳои барқи обии “Тоҷикистон” ва “Себзор” самараи ин ҳамкориҳо  мебошанд.  Раиси вилоят бунёди як қатор иншооти самти иҷтимоию иқтисодӣ, аз ҷумла муассисаи таҳсилоти миёнаи умумӣ, боғчаи бачагона, майдончаи варзиш ва кӯпруки мошингузарро, ки дар заминаи сохтмони НБО “Себзор” ба нақша гирифта шудаанд, муҳим арзёбӣ  кард. Ҳамзамон,  Мирзонабот Алишер аз дастгириҳои шарикони рушд дар масъалаи таъмини соҳаи кишоварзӣ бо нуриҳои минералӣ, дастрасии рефрежератор барои интиқоли шир аз деҳоти дурдаст ба мавзеи сохтмон ва  маркази вилоят, хариди таҷҳизоти муосири ташхисӣ барои раёсати сатандартизатсия, метрология ва назорати савдои вилоят изҳори қаноатмандӣ намуд. Таъкид шуд, ки Мақомоти иҷроияи ҳокимияти давлатии вилоят  масъалаи сохтмони   Муассисаи таҳсилоти миёнаи умумии рақами 18-и ноҳияи Роштқалъаро дар рӯзҳои наздиктарин  бо Вазорати  энергетика ва захираҳои оби ҷумҳурӣ ва Ширкати  “Помир энержи” ба таври мусбат ҳал  менамояд. 

Дар фарҷом  ҳар ду ҷониб изҳори итминони комил намуданд, ки барои тавсеи ҳамкориҳои минбаъда дар самтҳои мухталифи иҷтимоию  иқтисодӣ аз ҳамаи имкониятҳо истифода хоҳанд кард.     

 

Раҳмони ГУЛЗОР, “Ҷумҳурият”