Хабарҳо
ЛИГАИ ОЛӢ
Натиҷаҳои даври 16-ум
Бозиҳои даври 16-уми Чемпионати Тоҷикистон оид ба футбол миёни дастаҳои Лигаи олӣ ба анҷом расид. Вохӯрии марказии давр байни тимҳои «Истаравшан» ва «Истиқлол» мусовӣ (1:1) хотима ёфт.
Тибқи иттилои ЛФТ, «Хуҷанд» дар майдонаш ба дарвозаи «Файзканд» се голи беҷавоб зад.
Натиҷаи қувваозмоиҳои дигар: «Равшан-К» – «Регар-ТадАЗ» – 2:0, «Эсхата» – «Хатлон» – 0:0 ва КМВА – «Равшан-З» – 1:2.
Ҳамин тавр, пас аз 16 давр «Истиқлол» (14 бозӣ) бо 31 хол дар садри ҷадвал қарор дорад. Дастаи «Равшан» бо 27 хол ва «Хуҷанд» бо 25 хол дар зинаҳои дуюм ва сеюманд.
ҶОМИ ОСИЁ – 2022
Дар даври 1/4 ниҳоӣ Тоҷикистон бо Таиланд бозӣ мекунад
Дар бозии чорякниҳоии Ҷоми Осиё – 2022 оид ба футзал (Кувайт) тими миллии кишвар бо Таиланд (4 октябр) неру месанҷад.
Футзалбозони мо дар бозиҳои гурӯҳӣ бар Баҳрайн (4:3) ва Туркманистон (8:5) ғолиб омада, аз Ӯзбекистон (2:3) шикаст хӯрда, ба даври плей-офф роҳ ёфт.
Ёдовар мешавем, ки тими миллии кишвар пас аз 15 сол дубора ба марҳилаи 1/4 финал роҳхат гирифт.
БАСКЕТБОЛ
Бонувони амрикоӣ – қаҳрамони ҷаҳон
Баскетболбозбонувони ИМА дар зӯрозмоии ниҳоии Чемпионати ҷаҳон (22 сентябр – 1 октябр, Сидней, Австралия) мунтахаби Чинро бо ҳисоби 83:61 ноком сохтанд.
Бар пояи маълумоти сомонаи championat.com, мунтахаби бонувони ИМА маротибаи чорум пайи ҳам чемпиони ҷаҳон шуданд. Қаблан, онҳо солҳои 2010, 2014 ва 2018 ғолиб омада буданд.
Зинаи сеюмро мизбонон – Австралия ишғол кард.
Маҳмуд БАҲРОМ, шореҳи варзиш
Баёни ақида (0) Санаи нашр: №: Мутолиа карданд: 5760