МИР24. Дар ҷануби Қазоқистон машқҳои дастаҷамъии СААД оғоз ёфтанд. Амалиёти асосӣ дар машқгоҳи «Матибулоқ» дар минтақаи биёбони кӯҳсор сурат гирифт.  Шашу ним ҳазор низомӣ машқҳои махсуси гуногунро тамрин мекунанд. 

«Бори нахуст сохтори нави Неруҳои дастаҷамъии СААД, воҳиди муштараки ҳифзи радиатсионӣ, кимиёвиву биологӣ ва таъмини тиббӣ ба амалиёти амалӣ ҷалб карда мешавад», – гуфт сардори ситоди муттаҳидаи СААД, генерал-полковник Анатолий Сидоров.

Марҳилаи фаъоли машқҳои СААД то 7 октябр идома хоҳад кард.  

 

 

Россия ва Беларус созишнома дар бораи уҳдадориҳои андозии мутақобила ба имзо расонданд

Мир24. Россия ва Беларус созишнома дар бораи уҳдадориҳои андозии мутақобила ба имзо расонданд. Ин санадро сарвазирони ҳукуматҳои ду кишвар Михаил Мишустин ва Роман Головченко дар пайи музокирот дар Москва имзо карданд.

«Бо вуҷуди вазъи душвори иқтисодии беруна ва буҳрони иқтисоди ҷаҳонӣ, гардиши мол миёни Россия ва Беларус афзоиши устуворро нишон медиҳад. Соли гузашта он ба натиҷаи рекордии 38,5 миллиард доллари ИМА баробар шуд. Дар моҳҳои январ-июли соли ҷорӣ он боз 5 дарсад афзуда, ба 22 миллиард доллар расид. Содироти Беларус ба Россия бо суръати тезтар меафзояд – дар муқоиса бо ҳамин давраи соли гузашта чоряк баробар, беш аз 10 миллиард долларро ташкил медиҳад», – гуфт Сарвазири Россия Михаил Мишустин.

“Борҳо гуфта будем, ки танҳо тавассути талошҳои муштарак метавонем ба таҳримҳо муқовимат кунем. Мо на танҳо муқобилат мекунем, балки дар ин шароити ба назар ниҳоят душвор, тиҷорати мутақобиларо бомуваффақият инкишоф дода, робитаҳои истеҳсолиро таҳким мебахшем ва занҷирҳои нави нақлиётию логистикиро ба вуҷуд меорем», – таъкид кард Сарвазири Беларус Роман Головченко.

 

 

Болсонару ва Лула да Силва ба даври дуюми интихоботи президентии Бразилия роҳ ёфтанд

Мир24. Даври аввали интихоботи президентии Бразилия 2 октябр барпо гардид, ки дар он Президенти собиқи кишвар Луис Инасиу Лула да Силва ва Президенти феълӣ Жаир Болсонару бо дарёфти қисми зиёди овозҳо ба даври дуюм роҳ ёфтанд. 

Барои ғолиб шудан дар даври аввал зиёда аз 50 дарсади овозҳоро гирифтан лозим буд, ки ба ҳеҷ яки онҳо муяссар нашуд. Бинобар ин, мардуми Бразилия дар даври дуюм президенти кишварро интихоб мекунанд.  

 

 

Арманистон ва Озарбойҷон созишномаи сулҳро баррасӣ намуданд

Lenta.ru. Вазири корҳои хориҷии Арманистон Арарат Мирзоян ва вазири корҳои хориҷии Озарбойҷон Ҷейҳун Байрамов дар Женева вохӯрданд.

“Тарафҳо дар бораи созишномаи сулҳи Арманистон ва Озарбойҷон, таъмини ҳуқуқ ва кафолатҳои амнияти арманиҳои Қарабоғи Кӯҳӣ, аз ҷумла тавассути эҷоди механизми гуфтугӯҳо миёни Степанакерт ва Боку, табодули афкор карданд”,  –  омадааст дар гузориш. 

Илова бар ин, тавре ки дар Ереван мегӯянд, ҷонибҳо дар мавриди зарурати боз намудани масирҳои нақлиётӣ дар минтақа, ҳамчунин, ҷорӣ кардани “механизмҳои байналмилалии назорати вазъи марзӣ” ба мувофиқа расиданд.