Хабарҳо
Китоби Сарвари давлат ба забонҳои русӣ, англисӣ ва чинӣ тарҷума шуд
Бо ибтикори раёсати Донишкадаи давлатии забонҳои Тоҷикистон ба номи Сотим Улуғзода китоби дуҷилдаи «Забони миллат – ҳастии миллат»-и Пешвои миллат муҳтарам Эмомалӣ Раҳмон ба забонҳои маъруфи ҷаҳон – русӣ, англисӣ ва чинӣ тарҷума гардид, – хабар медиҳад АМИТ «Ховар» бо истинод ба Донишкада.
Барои тарҷумаи босифату шоистаи китоби «Забони миллат – ҳастии миллат» таҳти роҳбарии ректори Донишкада Жило Гулназарзода устодони варзида бо камоли муҳаббату садоқат кӯшиш ба харҷ доданд.
Китоби «Забони миллат – ҳастии миллат» бо ифтихори миллӣ ва эҳтиром ба забони модарӣ навишта шудааст. Аз ин рӯ, китоб зуд мақбули ҳамагон гашт ва барои сокинони мамлакат мояи ифтихор мебошад.
Ин китоб бори дигар бо далелҳои муътамад ва суханони баланду дилписанд бузургию тавоноӣ ва таърихи пуршарафи забони тоҷикиро собит менамояд.
Сафири Тоҷикистон ба Подшоҳи Таиланд эътимоднома супурд
Сафири фавқулода ва мухтори Ҷумҳурии Тоҷикистон дар Шоҳигарии Таиланд Ардашер Қодирӣ, ки қароргоҳаш дар Малайзия мебошад, ба Подшоҳи Шоҳигарии Таиланд Маҳа Ваҷиралонгкорн эътимоднома супурд,- хабар дод Вазорати корҳои хориҷӣ.
Сафир салому паёми Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро ба Подшоҳи Таиланд расонда, таъкид дошт, ки Тоҷикистон алоқаманди таҳким ва густариши робитаҳои дӯстӣ ва ҳамкории мутақобилан судманд бо Шоҳигарии Таиланд аст.
Омодасозии муштараки кадрҳои баландихтисос
Давлатшоҳ Гулмаҳмадзода, сафири фавқулода ва мухтори Тоҷикистон дар Россия, бо вазири илм ва таҳсилоти олии Федератсияи Россия Валерий Фалков вохӯрд. Ҷонибҳо рафти иҷрои тавофуқоти дар сатҳи президентҳои ду кишвар ҳосилшударо дар самти ҳамкориҳои башардӯстона, аз ҷумла ифтитоҳи филиалҳои нави донишгоҳҳои Россия дар Тоҷикистон ба манзури омода кардани мутахассисони касбӣ, инчунин, афзоиши теъдоди бурсияҳо барои донишҷӯёни тоҷик дар муассисаҳои таҳсилоти олии Россияро баррасӣ карданд.
Ба иттилои Вазорати корҳои хориҷӣ, мусоҳибон, ҳамчунин, дурнамои ҳамкориҳои дуҷониба дар бахшҳои маорифу илм, бахусус табодули донишҷӯён, омодасозии муштараки кадрҳои баландихтисоси илмию педагогӣ ва эътирофи мутақобилаи унвону дараҷаҳои илмиро матраҳ намуданд.
Рӯзҳои фарҳанги Тоҷикистон дар Эрон
Аз 3 то 9 октябри соли 2022 Рӯзҳои фарҳанги Ҷумҳурии Тоҷикистон дар Ҷумҳурии Исломии Эрон баргузор мегардад. Маросими бошукӯҳи ифтитоҳи он 3 октябри соли 2022 дар Муҷтамаи фарҳангии Аббосободи шаҳри Теҳрон бо иштироки шахсиятҳои намоёни сиёсӣ, фарҳангӣ, адабӣ ва аҳолии Теҳрон баргузор шуд.
Марям Холиқзода аз маркази матбуоти Вазорати фарҳанг хабар дод, ки маросимро вазири фарҳанги Тоҷикистон Зулфия Давлатзода ва вазири фарҳанг ва иршоди исломии Эрон Муҳаммадмеҳдии Исмоилӣ оғоз бахшиданд.
Барномаи ҳунарии шеъру суруди Тоҷикистон мавриди истиқболи гарми аҳли толор қарор гирифт. Дар маросим намоиши аксҳо ва мусаввараҳо, намунаҳои ҳунарҳои мардумӣ, либосҳои миллӣ доир гашта, меҳмонон бо меваҷот ва шириниҳои тоҷикӣ пазироӣ шуданд.
Инчунин, намоиши театрии “Дирафши ковиёнӣ”-и Театри давлатии ҷавонони Тоҷикистон ба номи Маҳмудҷон Воҳидов, барномаҳои ҳунарии устодони санъати тоҷик, шаби шеър бо иштироки шоирони шинохтаи тоҷик ва ҳузури адибони эронӣ ва намоиши филмҳои “Муаллим” ва “Роҳ”-и коргардон Носир Саидов баргузор мегардад.
Баёни ақида (0) Санаи нашр: №: Мутолиа карданд: 3350