ҶОМИ ОСИЁ – 2023

Наврасони мо марҳилаи интихобиро бо ғалаба оғоз намуданд

 

Дастаи мунтахаби наврасони Тоҷикистон (U-17) зери роҳбарии Раҳматулло Фузайлов марҳилаи интихобии Ҷоми Осиё – 2023 (гурӯҳи «Н», Варзишгоҳи марказии ҷумҳуриявии шаҳри Душанбе)-ро бо пирӯзӣ шуруъ кард. 

Футболбозони навраси мо ба дарвозаи Муғулистон се голи беҷавоб заданд. Тӯбҳоро Итгел Балчиндрож (худгол), Абубакр Сулаймонов ва Шеравган Саидов ба самар расонданд. 

Дар даври охири марҳилаи интихобӣ мунтахаби мо бо ҳамсолони худ аз Афғонистон (9 октябр) бозӣ мекунад. 

Дар марҳилаи интихобии Ҷоми Осиё-2023 (U-17) мунтахабҳои қора дар 10 гурӯҳ иштирок доранд. Тибқи низомнома, ғолибони гурӯҳҳо ва 5 дастаи беҳтарини зинаи дуюми гурӯҳҳо ба марҳилаи финалӣ, ки моҳи майи соли оянда дар Баҳрайн баргузор мешавад, роҳхат мегиранд.

 

 

ГӮШТӢ

Медали нуқраи Ҷамшед Мақсудов дар Чемпионати ҷаҳон 

Паҳлавони кишвар Ҷамшед Мақсудов (70 кг) дар Чемпионати ҷаҳон оид ба гӯштӣ миёни собиқадорон (4-9 октябр, Пловдив, Булғория) медали нуқра гирифт. 

Тибқи иттилои Кумитаи миллии олимпӣ, зӯрозмоиҳои даврӣ сурат гирифта, Ҷамшед дар даври аввал аз Шамше Тлашадзе (Гурҷистон) мағлуб шуда, сипас Гунар Спрунк (Олмон) ва Ивайло Саров (Булғория)-ро шикаст дода, ба нимфинал баромад. Барои роҳ ёфтан ба финал гӯштигири мо бар Убайдулло Эргашев (Ӯзбекистон) ғолиб омад. Дар набарди ҳалкунанда Ҷамшед Мақсудовро боз Шамше Тлашадзе ноком кард. 

 

 

ТАЭКВАНДО

Душанбе мизбони «Ҷоми сафири Корея»

 

8-9 октябр дар шаҳри Душанбе I мусобиқа оид ба таэквондо (WTF) – “Ҷоми сафири Корея” баргузор мешавад.

Дар мусобиқа варзишгарони дорои камарбанди сурх (дараҷаҳои 1, 2 ва 3) иштирок карда метавонанд. Ширкаткунандагон аз рӯи синну сол ба 4 гурӯҳ тақсим мешаванд. Ҳамагӣ зиёда аз 500 варзишгар дар сабқатҳои инфиродӣ ва даставӣ маҳорати худро нишон медиҳанд.

Тибқи иттилои Сафорати Ҷумҳурии Корея дар Тоҷикистон, мусобиқа ба муносибати 30-солагии истиқрори равобити дипломатии Корея ва Тоҷикистон, рушди варзиши таэквондо ва ҷалби наврасону ҷавонон ба ин намуди олимпии варзиш баргузор мешавад.

 

Маҳмуд БАҲРОМ, шореҳи варзиш