Маросими ҷамъбасти озмуни Муассисаи давлатии маҷаллаи «Бонувони Тоҷикистон» дар толори Академияи идоракунии давлатии назди Президенти  Ҷумҳурии Тоҷикистон бо ҳузури намояндагони  Маҷлиси намояндагони Маҷлиси Олии Ҷумҳурии Тоҷикистон, Кумитаи кор бо занон ва оила, Иттифоқи журналистон бо тантана доир шуд.  

 

Зикр гашт, ки озмун ба ифтихори 30-юмин солгарди Иҷлосияи  тақдирсози XVI Шурои Олии Ҷумҳурии Тоҷикистон роҳандозӣ гардида як сол идома ёфт. Шоҳона Одиназода, сармуҳаррири маҷаллаи «Бонувони Тоҷикистон», ҳадафи баргузории озмунро дар васеъ инъикос намудани нақши Иҷлосияи мазкур дар давлатдории навини тоҷикон, хидматҳои мондагори Пешвои миллат муҳтарам Эмомалӣ Раҳмон дар рушди кишвар ва дастовардҳои дигари замони Истиқлоли давлатӣ арзёбӣ намуд. 

- Иҷлосияи XVI Шурои Олӣ ба майдони сиёсат нафареро ворид намуд, ки Тоҷикистонро аз вартаи ҷанги таҳмилӣ берун кашида, соҳибистиқлолии диёрро таъмин намуд.  

Дар замони истиқлол Ҳукумати мамлакат ба дастовардҳои беназир ноил шуд. Аз ҷумла, дар ин давра барои дастгирии ҳамаҷонибаи занон, чораҳои зиёд андешидаву роҳандозӣ гардиданд, ки дар натиҷа мақоми занон дар ҷомеа боло рафт. Ин муддат, ҳамчунин, аз сиёсати дурусти пешгирифтаи Пешвои миллат муҳтарам Эмомалӣ Раҳмон илму маориф, фарҳанг, тиб низ бамаротиб рушд намуданд. 150 матлабе, ки давоми сол ба озмуни «Фарзанди Тоҷикистонам» ворид  гардид,  далели  ҳамин  гуфтаҳо мебошанд, – иброз дошт Ш. Одиназода.

Абдухалил  Ғафурзода, ректори Академияи идоракунии давлатии назди Президенти Ҷумҳурии Тоҷикистон иқдоми маҷалларо муҳим ва саривақтӣ арзёбӣ намуд. Ӯ гуфт, ки «Бонувони Тоҷикистон» ба қаламкашони ҷумҳурӣ  бори дигар имкон фароҳам овард, то нақши Иҷлосияи XVI Шурои Олии Ҷумҳурии Тоҷикистонро дар таъсиси давлатдории навин баррасӣ намоянд. 

Аз 150 матлабе, ки давоми сол ба озмуни мазкур ворид гардид, 33 матлаби беҳтарин рӯйи чоп омад. Ҳайати ҳакамони озмун баъди омӯзиши матолиби 33 муаллиф – иштирокчиёни озмунро бо диплом ва туҳфаҳои хотирмон қадр карданд. 

«Бонувони Тоҷикистон» дар маросими ҷамъбаст, ҳамчунин, як қатор шабакаҳои телевизионӣ, радио ва рӯзномаву маҷаллаҳоро бо сипоснома сарфароз кард. 

 

Фарзона ФАЙЗАЛӢ, «Ҷумҳурият»