Ҳамкориҳои Бонки ҷаҳонӣ бо Ҷумҳурии Тоҷикистон дар зарфи ду соли охир ба сатҳи сифатан нав баромад ва дурнамои боз ҳам хубтаре касб хоҳад кард. Ин муассиса ҳамчун шарики боэътимоди Ҷумҳурии Тоҷикистон барномаҳоеро рӯи даст дорад, ки дар иҷрои нақшаҳо ва таъмини рушди минбаъдаи иқтисодии кишвар мусоидат хоҳанд кард.

- Ин нуктаро Аксел ван Тротсенбург, директори идорӣ оид ба фаъолияти амалиётии Бонки ҷаҳонӣ, баъд аз мулоқот бо Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ҳузури хабарнигорон баён намуд. Ӯ бо изҳори қаноатмандӣ аз сатҳи ҳамкориҳои кунунии Тоҷикистон ва Бонки ҷаҳонӣ чунин изҳор дошт: «Суҳбати мо бо Ҷаноби Президент бисёр фарогиру судбахш буд, ки ба таҳкими минбаъдаи ҳамкориҳо таъсири  амиқ  хоҳад  гузошт.  Аз ҷумла, дар ҷараёни мулоқот вобаста ба иқтидори захираҳои гидроэнергетикии Тоҷикистон, рушди истеҳсолу содироти энергияи тоза гуфтугӯҳои судманд анҷом додем. Ҳамчунин, баррасии таҳдиду хатарҳо, афзоиши таваррум ва пайомади дигар буҳронҳои ҷаҳони имрӯза, ки ба тамоми кишварҳои олам таъсир доранд, дар меҳвари мулоқоти мо қарор дошт».

Ба гуфтаи директори идорӣ оид ба фаъолияти амалиётии Бонки ҷаҳонӣ, ӯ дар мулоқот бо Президенти Ҷумҳурии Тоҷикистон итминон додааст, ки барои тавсеаи минбаъдаи ҳамкориҳои ин муассисаи бонуфузи молиявӣ бо кишвари мо иқдомҳои нав меандешанд, то соли оянда 30-солагии муносибатҳои шарикӣ бо дастовардҳои тоза ҷашн гирифта шавад.

 

Фирӯз РАҲМОНИЁН,

«Ҷумҳурият»