Дар даврони Истиқлоли давлатӣ ба хотири ҳимоя ва рушди фарогири забони тоҷикӣ Қонуни Ҷумҳурии Тоҷикистон «Дар бораи забони давлатии Ҷумҳурии Тоҷикистон» (5 октябри соли 2009) қабул гардид, ки тавассути ин санад забони тоҷикӣ ҳамчун забони сиёсату қонунгузорӣ ва коргузориву муошират эътироф шуд. Гузашта аз ин, барои амалӣ сохтани муқаррароти он дар назди Ҳукумати Ҷумҳурии Тоҷикистон Кумитаи забон ва истилоҳот таъсис ёфт. 

Аз ин нуқтаи назар, нақши ҳар як хизматчии давлатӣ дар рушду густариши забони давлатӣ, татбиқи ҳадафҳои сиёсати давлатӣ оид ба забон, самаранок амали гардидани Барномаи рушди забони давлатӣ барои солҳои 2020 – 2030 ва мавҷудияти ҷомеаи мутамаддину соҳибфарҳанг, ки дар он муносибатҳои волои инсонӣ ба мушоҳида мерасад, хеле зарур ва муҳим мебошад. Тибқи моддаи 5 Қонуни Ҷумҳурии Тоҷикистон «Дар бораи забони давлатии Ҷумҳурии Тоҷикистон», коргузории мақомоти ҳокимияти қонунгузор, иҷроия ва судӣ, инчунин, мукотиботу коргузории ташкилотҳое, ки дар Ҷумҳурии Тоҷикистон фаъолият мекунанд бо забони давлатӣ сурат мегиранд. 

Дар асоси дастуру ҳидоятҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қарори Ҳукумати Ҷумҳурии Тоҷикистон «Дар бораи Қоидаҳои имлои забони тоҷикӣ ва Аломатҳои китобатии забони тоҷикӣ» аз 30 июни соли 2021, № 268, ба тасвиб расид, ки риояи он ҳатмист. 

Бояд гуфт, ки Ҳукумати Ҷумҳурии Тоҷикистон дар баробари рушд ва вусъати бештар пайдо намудани доираи нуфузи забони давлатӣ, ҷиҳати инкишофи забон ва фарҳанги ақаллиятҳои миллии муқими Тоҷикистон тадбирҳои зиёд амалӣ менамояд. Санадҳои меъёрии ҳуқуқие, ки дар бораи забон қабул шудаанд, ҳифзи забони давлатӣ ва дигар забонҳои ҳудудӣ ҷумҳуриро таъмин мекунанд.

Нақши мақомотҳои давлатӣ, аз ҷумла хизматчиёни давлатӣ барои баланд бардоштани мақоми забони давлатӣ, хеле калон аст. Ин қишри ҷомеа бояд талаботи Қонуни Ҷумҳурии Тоҷикистон «Дар бораи забони давлатии Ҷумҳурии Тоҷикистон» ва қоидаҳои имлои забони тоҷикӣ ва аломатҳои китобатии забони тоҷикиро донанд ва риоя намоянд. Чунки дар фаъолияти ҳаррӯзаи коргузорӣ ва муошират бо шаҳрвандон аз он истифода мебаранд, ки роҳи муассири таблиғ ба ҳисоб меравад. 

Мутаассифона, ҳолатҳое ба чашм мерасанд, ки мукотибот – коргузорӣ мушкилфаҳм ва дар ҷавобҳои аризаи шаҳрванд, мактубҳо қоидаҳои имлои забони тоҷикӣ риоя намегарданд. Аз ин рӯ, мо – кормандони мақомоти иҷроияи ҳокимияти давлатӣ, бояд бикӯшем то забони тоҷикиро дар мақоми коргузории расмӣ ва муоширати дохилӣ васеъ истифода бурда, зиёда аз ин, дар кӯча, ҷойҳои ҷамъиятӣ ба муоширати дағалонаи баъзе аз шаҳрвандон вокуниши ҷамъиятӣ нишон диҳем. Корманди мақомоти давлатӣ бояд барои амалӣ намудани дастуру ҳидоятҳои Пешвои миллат муҳтарам Эмомалӣ Раҳмон «забони шево ва шоиронаи тоҷикиро мисли модар ва Ватани худ дӯст дорем ва онро ҳамчун гавҳари бебаҳои ҳастиамон ҳифз кунем» содиқ бошем.

  

С. МАҶИДЗОДА, мудири бахши ҳуқуқи 

дастгоҳи раиси ноҳияи 

Фирдавсии шаҳри Душанбе