Шоми 11 октябр Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба ифтихори сафари расмии Президенти Ҷумҳурии Беларус муҳтарам Александр Лукашенко дар Бӯстонсаройи Ҳукумати Ҷумҳурии Тоҷикистон зиёфати ғайрирасмӣ оростанд, ки бо фазои гарму самимиаш ба маҳфили «Шоми дӯстӣ» табдил ёфт.

 

Президенти Ҷумҳурии Тоҷикистон муҳтарам Эмомалӣ Раҳмон ҳамроҳи меҳмони олимақом – Президенти Ҷумҳурии Беларус Александр Лукашенко дар Бӯстонсарой ба сайругашт баромаданд.

Сайругашт дар фазои басо гарму самимӣ ва дӯстию бародарӣ ҷараён гирифт. Меҳмони олимақом аз табиати сабзу ҳавои тозаи Тоҷикистони офтобӣ ҳаловат бурда, аз намоишгоҳи неъматҳои табиии диёри биҳиштосои мо боздид карданд.

Намоишгоҳи маҳсулоти кишоварзӣ ва таомҳои миллии Тоҷикистон дар мавзеи зебою назаррабои Бӯстонсарои ҳукуматӣ ташкил гардида, дар роҳравҳои он ҳар як намуди маҳсулоти кишоварзӣ бо шаклу услуби хос ва ороиши гуногун гузошта шуда буд.

Дар намоишгоҳ даҳҳо меваҳои аз лиҳозу таъму сифат беҳамто, ба мисли ангуру меваҳои донадор ва ситрусӣ, инчунин, хушкмеваҳои босифат, аз қабили мағзу бодом, мавизу писта ба маъраз гузошта шуда буданд ва меҳмони олиқадр ба онҳо ва намудҳои гуногуни таомҳои миллии мо таваҷҷуҳи зиёд зоҳир карда, ба сифаташон баҳои баланд доданд.

Воқеан, Тоҷикистони офтобрӯя маҳсулоти аз лиҳози экологӣ тозаю хушсифат дорад ва дар ҷаҳон бо меваю сабзавоти аълосифат, хушкмеваҳо ва таомҳои лазизи миллӣ шуҳрати беандоза касб намудааст.

Дар Бӯстонсарой Сарвари кишвари дӯсти Беларус, ҳамчунин, ба дарахтони мевадиҳанда ва сояафкану ороишии боғчаи ҳудуди қароргоҳ, ки аксараш аз ҷониби Президенти мамлакат муҳтарам Эмомалӣ Раҳмон аз хориҷи мамлакат ворид ва шинонда шудаанд, таваҷҷуҳи хос зоҳир карданд.