иҷтимоиёт
ПАЙРАВИ ДЕҲҚОНИ АСИЛ
Миралӣ Маҳмадалиев ҳамчун фарзанди деҳқон, дар тули умри пурбаракаташ аз кишоварзи одӣ сар карда, то ба мартабаи раиси хоҷагии калонтарини Ҷумҳурии Тоҷикистон, ходими намоёни ҷамъиятӣ расида, дар пешрафти соҳаи кишоварзӣ ҳиссаи сазовор гузошта, ҳамчун мураббии мушфиқу меҳрубон пайравони зиёдеро дар соҳаи кишоварзӣ, боғдорӣ, чорводорӣ ва зироаткорӣ тарбия намуда ба воя расонидаанд.
Эмомалӣ РАҲМОН
Бобои деҳқон Миралӣ Маҳмадалиев шогирдони зиёдеро тарбия ва ба воя расондааст, ки Неъматбой Олимов зодаи Ҷамоати деҳоти Чоркӯҳи ноҳияи Исфара аз зумраи онҳост. Ин марди дардошнои мардумро дар ноҳияи Исфара ва берун аз он аксарият мешиносанд ва ҳурмату эҳтиромашро ба ҷо меоранд. Деҳқони асил, пайрави бобои Миралӣ, сарвари кордони пуртаҷриба, донандаи асрори замин дар ободии диёр ва фаровонии дастархони мардум саҳми арзанда гузоштааст. Неъматбой Олимов баъди хатми Университети давлатии Тоҷикистон ба номи В. И. Ленин (ҳоло Донишгоҳи миллии Тоҷикистон) соли 1976 бо роҳхат ба собиқ совхози “Иттифоқ”-и ноҳияи Исфара ба кор фаро гирифта шуд ва аз соли 2000 то 2020-ум сарварии хоҷагиро ба зимма дошт.
Ҳини суҳбат Неъматбой Олимов иброз дошт: “Ман аз он мефахрам, ки пайраву шогирди бобои Миралӣ Маҳмадалиев ҳастам. Таҷрибаи бою пурғановати ин шахси барӯманду марди саҳроро пайравӣ ва идома бахшидам ва Кооперативи истеҳсолии тухмпарварии “Чоркӯҳ” дар солҳои сарварии ман дар истеҳсоли ҳама намудҳои маҳсулоти кишоварзӣ натиҷаҳои назаррасро соҳиб гашт”.
Хоҷагӣ 407 гектар боғ дошт, ки дар асоси қарори Ҳукумати Ҷумҳурии Тоҷикистон аз ин миқдор боғ 200 гектараш боғи куҳансоли бобоӣ буд. Дар ин мавзеъҳо боғи нав бунёд намуданд. Соли 2013 зимни ташрифи худ Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба раиси хоҷагӣ – Неъматбой Олимов тавсия доданд, ки дар хоҷагӣ боғи олуи сиёҳ бунёд намоянд ва ҳамин тавр ҳам кард, ки то ҳанӯз мардум аз накҳати он ҳаловат мебаранд ва хоҷагӣ даромади хуб мегирад.
Ба қавли директори МТМУ №65 Ҳодӣ Қаюмов Неъматбой Олимов нафақат фарди наҷиб, оқил ва кордон, балки шахси саховатманд буда, дар соҳаи маориф ҳам, дастгириҳояш басо назаррасанд.
Неъматбой Олимов бо Фармони Президенти Ҷумҳурии Тоҷикистон 16 августи соли 2013 бо медали Хизмати шоиста қадр шуд.
Р.S. Мақсад аз рӯи коғаз овардани ин мавод на баҳри шаъну шуҳрат, балки аз таҷрибаи ин зумра шахсон, насли имрӯза дарси ибрат бигиранду пайгир ва идомадиҳандаи кори эшон бошанд.
Қ. ҚАЛАНДАРОВ, рӯзноманигор
Баёни ақида (0) Санаи нашр: 13.10.2022 №: 196 Мутолиа карданд: 628