Нашрияи расмии Ҷумҳурии Тоҷикистон -  рӯзномаи «Ҷумҳурият»  фаъолияти нуҳмоҳаашро ҷамъбаст намуд. Ҷаласаро сармуҳаррири рӯзнома Қурбоналӣ Раҳмонзода  ҳусни оғоз бахшида, зимни таҳлили фаъолияти кормандони эҷодиву техникӣ натиҷаҳоро чашмрас арзёбӣ кард. 

 

- Рӯзнома, ки ҳафтае панҷ маротиба бо теъдоди 48 ҳазору 150 нусха аз чоп мебарояд, ҳамчун нашрияи расмӣ  дар тарғибу ташвиқ ва иҷрои ҳадафҳои созандаи давлату Ҳукумати кишвар, алалхусус дастуру ҳидоятҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки аз Паём ба Маҷлиси Олии Ҷумҳурии Тоҷикистон аз 21 декабри соли 2021 бармеоянд,  саҳми арзанда мегузорад. Ба матлабҳои муғризонаи доираҳои манфиатдор сари вақт вокуниш нишон дода, ҷомеаро бо иттилои воқеӣ таъмин месозад. Давоми нуҳ моҳи сипарӣ рӯзнома ин рисолати хешро пурра иҷро намуд. Ҳайати эҷодии рӯзнома  тавонист тамоми  рӯйдодҳои муҳими сиёсӣ, иқтисодӣ ва иҷтимоиву фарҳангии кишварро пурра инъикос намояд. Рӯзнома, ҳамчунин, матлабҳое ба нашр расонд, ки дар баланд бардоштани   сатҳи маърифатӣ, худшиносӣ ва худогоҳӣ таъсири амиқ мегузоранд. Ҳайати эҷодӣ, дар баробари омода намудани хабару гузоришҳо, матлабҳои таҳлилию танқидӣ низ ба нашр расонд, ки аз ҷониби хонандагон ҳамовозии зиёд ба бор овард. 

Таъкид гардид, ки чанде пеш «Ҷумҳурият» ба пешвози Рӯзи забони давлатӣ ва 30-солагии Иҷлосияи таърихии ХVI Шурои Олии Ҷумҳурии Тоҷикистон нашри махсуси рангаро дар ҳаҷми 70 саҳифа бо сифати баланд аз чоп баровард. Матолиби нашршуда роҳи шебу фарози таърихи навини давлатдории моро мунъакис менамояд, ки бо мутолиаи онҳо рӯйдодҳои соҳибистиқлолӣ пеши назар меоянд.   

Ин муддат ютуб-канали рӯзнома низ фаъол буд ва якчанд барномаҳои пурмуҳтаво омодаву манзур дошт. Ҳайати эҷодӣ ба муносибати санаҳои муҳими таърихӣ, иду ҷашнҳои миллӣ чорабиниҳои гуногун ташкил намуда, ба ин восита, дар пиёда сохтани сиёсати фарҳангӣ ва рушди кишвар саҳм мегиранд.

Масъалаи дигаре, ки дар маҷлис мавриди баррасӣ қарор гирифт, дар сатҳи баланд доир намудани озмуни навбатии «Ҷумҳурият» «Дуои модар» мебошад. Зикр шуд, ки озмун бо дастгирии Мақомоти иҷроияи ҳокимияти давлатии вилояти Суғд баргузор гашта, тибқи нақша, соли 2023 дар арафаи Ҷашни Истиқлоли давлатӣ дар ду бахш ҷамъбаст мегардад.

Ҳадафи озмун пайравӣ аз арҷгузории камназири Пешвои миллат муҳтарам Эмомалӣ Раҳмон ба Зан - Модар ва ба ин роҳ тақвияти ҳисси ватанпарастии ҷавонон ва тарбияи онҳо дар роҳи дӯст доштани Модар - Ватан арзёбӣ гашт. 

Ташкилоти ибтидоии Ҳизби Халқии Демократии Тоҷикистон дар рӯзномаи «Ҷумҳурият» масъалаи ба сафи ҳизб пайвастани кормандони ҷавони рӯзномаро баррасӣ намуд. Дар маҷлис ба 7 нафар корманди рӯзнома: Наргис Розиқова, Зулола Бобораҷабова, Сайфулло Ашуров, Комрон Сафаров, Маҳмуд Мирзоён, Зикрулло Раҷабов, Шаҳноза Сабурова ва  Ҷӯрабек Негматов, ки ба сафи ҳизб пайвастаанд, дафтарчаи узвият супурда шуд.  

                                                                         

Фарзона ФАЙЗАЛӢ, "Ҷумҳурият"