17 октябр Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Раиси Маҷлиси миллии Маҷлиси Олӣ, раиси шаҳри Душанбе Рустами Эмомалӣ дар ноҳияи Синои пойтахт тарабхонаи бразилии "Латина-Душанбе" (Latina-Dushanbe)-ро ифтитоҳ карданд.

Тавре иттилоъ доданд, иншооти нави хизматрасонӣ, ки дар маҳали хушбоду ҳавои соҳили "Кӯли ҷавонон" қомат афрохтааст, ба хотири ба мизоҷон расондани хизматрасонии сатҳи ҷаҳонӣ ва пешниҳод кардани таомҳои наву гуногуни болаззат бо бренди ширкати машҳури бразилӣ сохта шудааст. Соҳибкорони ватандӯст, дар баробари бунёди иншооти муосири маишию хизматрасонӣ, ба масъалаи таъсису таъмини ҷойҳои нави кор барои сокинони пойтахт аҳамияти аввалиндараҷа додаанд. Дар тарабхона 50 нафар бо кори доимӣ таъмин гашт.

Тарабхона имкон дорад дар як вақт ба 250 нафар хизмат расонад. Он аз дигар марказҳои маишию хизматрасонӣ бо тарҳи нодир ва тарзи нави пешниҳоди сихкабобҳову хӯришҳои гуногун фарқ мекунад. Ороиши зебои тарабхона, истифодаи ашёҳои аз ҷиҳати экологӣ тоза ва мусиқии форам иқлими гарми кишвари бразилияро бозгӯ менамояд.

Иншоот бо усули "франшиза", яъне дар асоси шартнома истифода бурдани бренди машҳури хориҷӣ ва технологияи он бунёд ёфт. Барои пеш бурдани кори тарабхона ва пухтани таомҳои гуногун шаҳрванди Бразилия ҷалб гардидааст, ки дар ҳамкорӣ бо ошпазҳо ва кадбонуҳои тоҷик ба мардум хизмат мерасонад.

Дар тарабхонаи "Латина-Душанбе", ки дар ҳудуди кишварҳои аъзои ИДМ нахустин мебошад, 110 намуд хӯрок тайёр ва ба мизоҷон пешниҳод мешавад. Атрофи тарабхона барои ҷалби ҳарчи бештари меҳмонони дохилӣ ва назаррабо гардондан  бо дарахтони нодири ороишӣ оро ёфтааст. Дар фасли гармо имкон аст, ки дар ҳудуди тарабхона ва лаби соҳили кӯл зери чатрҳои сафед ба меҳмонон таомҳои лазиз ва дигар хизматрасониҳо пешкаш гардад.

Бо бовар гуфтан мумкин аст, ки дар шароити муосир ва дар ҳолати афзоиши шумораи сайёҳону меҳмонони пойтахт, фаъолияти чунин иншооти муосир ба талабот ҷавобгӯ хоҳад буд. Ин як навъ муаррифии сатҳи баланди меҳмоннавозии бою қадимаи тоҷикон аст.

Президенти мамлакат муҳтарам Эмомалӣ Раҳмон, баъди шиносоӣ бо шароит ва сатҳи хизматрасонӣ дар тарабхона, ба иқдоми соҳибкорони ватанӣ ҷиҳати обод кардани як гӯшаи диёр ва таъсиси ҷойҳои нави кор изҳори сипос намуданд.

Маросими ифтитоҳи расмии тарабхонаи "Латина-Душанбе" 22 октябр бо доир кардани шоу-барномаи рангини бразилӣ баргузор мешавад.