Маркази матбуоти раёсати Қӯшунҳои сарҳадии Кумитаи давлатии амнияти миллии Ҷумҳурии Тоҷикистон дар вилояти Суғд изҳор медорад, ки қатъи назар аз тавофуқоти ҳосилшуда дар хусуси роҳ надодан ба муноқишаҳои навбатӣ дар сарҳади давлатии Тоҷикистону Қирғизистон, ходимони сиёсӣ ва низомии Ҷумҳурии Қирғизистон бо муроҷиатҳои моҷароҷӯёнаи худ ба барангехтани кинаву адовати миллӣ мусоидат карда, ба муносиботи байниҳамдигарӣ ва байналмилалӣ зиён мерасонанд. Дар ин бора АМИТ «Ховар» хабар медиҳад.

19-уми октябри соли ҷорӣ вазири мудофиаи Ҷумҳурии Қирғизистон Бактибек Бекболотов зимни нишасти матбуотӣ баён дошт: «Байни Қирғизистону Тоҷикистон сулҳ нахоҳад шуд». Ин изҳороти иғвоангезона пурра муқобили ҳалли масъалаҳои сарҳадӣ бо роҳи дипломатӣ мебошад. Б. Бекболотов ишора кард, ки мушкилоти муайянкунӣ ва аломатгузории марзӣ то лаҳзае, ки силоҳҳои вазнин аз хатти сарҳади давлатӣ берун бурда нашаванд, боқӣ мемонанд. Ҳамзамон бо ин, хабар дод, ҷониби Қирғизистон маҷмуи мушакандози зенитии С-125 «Печора-2БМ» харидааст ва дар ҳудуди вилояти Боткен ҷойгир карда мешавад. Амалкарди вазир ошкоро бар хилофи мавқеъгирии роҳбарияти Қирғизистон дар хусуси аз тариқи гуфтушунид ва бо назардошти муносибатҳои дӯстонаи ду халқи ҳамсоя ҳал кардани масъалаҳои баҳсӣ равона шудааст.

Ҳадафи асосии изҳороти мазкур тезутунд сохтани вазъият дар сарҳади давлатии Қирғизистону Тоҷикистон мебошад. Гузашта аз ин, мавқеи  узви  Ҳукумати  ҶҚ бо протоколҳои имзошуда таҳти № 39, № 41, ва № 42, ки тибқи онҳо, масъалаҳои муайянкунии сарҳад бояд дар руҳияи ҳусни ҳамҷаворию якдигарфаҳмӣ ҳалли худро ёбанд, мухолифат мекунад. Ҷойгиркунии воситаҳои иловагии зиддиҳавоӣ дар вилояти Боткен вайрон кардани банди «е»-и Протоколи № 42 аз 25-уми сентябри соли 2022 мебошад.

Маркази матбуоти раёсати Қӯшунҳои сарҳадии КДАМ Ҷумҳурии Тоҷикистон дар вилояти Суғд изҳор медорад, ки муроҷиатҳои моҷароҷӯёнаи ходимони сиёсӣ ва низомии Қирғизистон муқобили уҳдадориҳои базиммагирифтаи тарафҳо буда, ба мураккабшавии вазъият дар сарҳад ва боиси пайдо шудани ҳисси нобоварӣ нисбат ба якдигар мегарданд.

Аз ин хотир, раёсати Қӯшунҳои сарҳадии КДАМ ҶТ дар вилояти Суғд даъват мекунад, ки ба паҳн сохтани чунин суханронӣ ва муроҷиатҳои мансабдорон, ки метавонанд мураккабшавии вазъият, душманию бадбиниро байни ду халқ ба вуҷуд оранд, роҳ дода нашавад.