Қабули Конститутсия арзишмандтарин дастоварди мардум ва давлати тоҷикон дар интиҳои асри гузашта ба шумор рафта, натиҷаи мантиқии талошҳои ҷомеаи адолатпарвар дар роҳи расидан ба марҳалаи тозаи рушди инкишофи хеш ва муаррифии кишвари мо ба оламиён мебошад.

Эмомалӣ РАҲМОН

 

Конститутсия қонуни асосии давлат буда, сохти ҷомеа ва шакли давлатдориро муайян мекунад.

Бинобар ин, Конститутсияи Тоҷикистони соҳибистиқлол, ки 6 ноябри соли 1994 қабул гардид, дар таърихи навини кишвар рӯйдоди воқеан сарнавиштсоз, муайянкунандаи роҳу равиш ва рушди устувори мамлакат гардид. Чунки таҳияи Конститутсия бо ҷалби неруҳои ақлонии ҷомеа, бо назардошти манфиатҳои олии миллату анъанаҳои пурғановати таърихиву фарҳангии халқи тоҷик ва истифода аз таҷрибаву дастовардҳои давлатҳои пешрафтаи ҷаҳон дар самти бунёди ҷомеаи демократӣ сурат гирифта буд.

Дар  моддаи  1 Конститутсия таъкид шудааст, ки Тоҷикистон давлати иҷтимоӣ буда, барои ҳар як инсон шароити зиндагии арзанда ва инкишофи озодонаро фароҳам меорад. 

Дар сатҳи  Конститутсия  дарҷ  гардидани  кафолатҳои фаъолияти озоди иқтисодӣ, соҳибкорӣ ва эътирофи моликияти хусусӣ ба созмон додани асосҳои иқтисодиёти миллии пешрафта мусоидат намуда, барои таъмини ҳадафҳои давлати иҷтимоӣ, яъне таъмини шароити арзандаи зиндагӣ ба ҳар кас роҳнамо гардид ва имкон дод, ки барои рушди иқтисодии кишвар даҳҳо стратегияву барномаҳои давлатӣ қабул ва татбиқ карда шаванд. 

Барои дар амал татбиқ кардани ин мақсад Президенти Ҷумҳурии Тоҷикистон муҳтарам Эмомалӣ Раҳмон дар Паёми худ 20 январи соли 2016 се ҳадафи миллӣ: раҳоӣ бахшидани мамлакат аз бунбасти коммуникатсионӣ ва ба кишвари транзитӣ табдил додани он, расидан ба истиқлолияти энергетикӣ, таъмин намудани амнияти озуқавориву дастрасии аҳолӣ ба ғизои хушсифат, инчунин, 26 декабри соли 2018 дар Паёми навбатии худ бо назардошти аҳамияти соҳаи саноат дар ҳалли масъалаҳои иқтисодиву иҷтимоӣ ва таъсиси ҷойҳои корӣ ҳадафи чоруми миллӣ – саноатикунонии босуръати кишварро эълон кард.

Таҳти роҳбарии хирадмандонаи Пешвои миллат Ҳукумати Тоҷикистон соли 2017 ба яке аз ҳадафҳои стратегии худ – истиқлолияти энергетикӣ ноил шуд ва Тоҷикистони сепорчаро ба қаламрави воҳид табдил дод.

Тибқи маълумот то соли 2022 бо мақсади расидан ба истиқлолияти энергетикӣ 75 фоизи инфрасохтори энергетикии мамлакат навсозӣ гардидааст.

Дар замони истиқлолият маданияти истифодабарии замин куллан беҳтар гардида, аз як қитъаи замини обӣ гирифтани 2 – 3 ҳосил ба ҳукми анъана даромад ва мардум аз ҷиҳати таъминот бо маводи озуқа танқисӣ накашида истодаанд.

Ҳукумати мамлакат тавассути таъсиси корхонаҳои нав, барқарорсозии иқтидорҳои мавҷуда ва афзоиш додани ҳаҷми истихроҷи канданиҳои фоиданок ҳадафи стратегии саноатикунонии босуръати мамлакатро амалӣ хоҳад гардонд. 

Боиси ифтихор аст, ки ҳадафҳои стратегии мамлакат бо назардошти манфиатҳои миллӣ давра ба давра амалӣ гардида, сатҳу сифати зиндагии мардум баланд ва шароити зист беҳтар гардида истодааст.   

Бинобар ин, мо – ҷавононро зарур аст, ки танҳо дар чорчӯбаи Конститутсия ва қонун зиндагӣ карда, барои амалишавии ҳадафҳои стратегии давлат, баланд бардоштани ҳисси худшиносӣ, эҳтирому арҷгузорӣ ба арзишҳои миллӣ пайваста кӯшиш намоем.   

 

Шоҳин ВАЛИЗОДА,

ёрдамчии муовини раиси Суди 

конститутсионии Ҷумҳурии Тоҷикистон