Аз файзи сиёсати адолатпарваронаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон фаъолияти мақомоти судӣ, ҳамчун шохаи мустақили ҳокимияти давлатӣ сол ба сол таҳким ёфта, дар низоми ҳуқуқии мамлакат ҳамчун кафили ҳимояи ҳуқуқу озодиҳои инсон ва шаҳрванд амал менамояд. Мустақилона, босалоҳият ва бидуни дахолати мақомоти дигар фаъолият намудани мақомоти судӣ, имкон фароҳам овард, ки арзишҳои ҷомеаи шаҳрвандӣ ва адолати иҷтимоӣ ҳифзу таъмин карда шаванд.

 

Воқеан, таҳкими ҷойгоҳи мақомоти судӣ ва мустаҳкам намудани пояҳои фаъолияти он маҳз бо таваҷҷуҳ ва дастгириҳои доимии Пешвои миллат ба амри воқеӣ табдил ёфт. Сарвари давлат барҳақ чунин таъкид мекунанд: «Имрӯз барои ҷамъият ҳимояи судии пурқувват ва боэътимод беш аз пеш зарур мебошад ва онро суде таъмин карда метавонад, ки воқеан, неруманд ва дахлнопазир бошад».

Агар ба умқи ин гуфтаҳои Президенти маҳбуби кишвар фурӯ равем, дармеёбем, ки барои корманди мақомоти судӣ на танҳо донишу фаҳмиши баланди ҳуқуқиву сиёсӣ, балки маърифати воло низ зарур аст. Зеро дар рафти баррасии парвандаҳо судя бояд аз хислат, табиати пуртазод, гирумонҳои ботинӣ ва аломатҳои зоҳирии шаҳрвандон огоҳ бошад ва мӯшикофона чунон қилро аз хамир ҷудо кунад, ки дар ҳалнома дигар ҷойи баҳс намонад. Барои муваффақ шудан дар иҷрои ин рисолат, албатта, аз ҳар як додрас донишу тафаккури баланд тақозо мешавад.

Дастгирӣ ва ғамхории пайвастаи ҳокимияти судӣ аз ҷониби давлату Ҳукумати кишвар, қабули санадҳои меъёрии ҳуқуқии ҷавобгӯ ба талаботи имрӯза, бомаром идома ёфтани ислоҳоти низоми судӣ ва беҳтар гардидани шароити иҷтимоии кормандони мақомоти судӣ боиси он гардид, ки ҳокимияти судӣ дар кишвар ташаккул ёфта, бо вуҷуди баъзе камбудиҳо эътимоди аҳолӣ ба ин ниҳоди ҳокимияти давлатӣ рӯз ба рӯз меафзояд. 

Ёдамон  ҳаст, ки ҳанӯз 21 ноябри соли 2019  Пешвои муаззами миллат ҳангоми мулоқот бо кормандони мақомоти судӣ дар баробари зикри дастовардҳои соҳа, ҳамзамон, камбудиро  низ  ёдовар  шуда, таъкид  доштанд,  ки дар фаъолияти кории судҳо дар баъзан маврид риоя накардани муҳлати баррасии парвандаҳои судӣ ба мушоҳида мерасад. Бинобар сабаби ба талаботи қонунгузории амалкунанда ҷавобгӯ набудани сифати таҳияи санадҳои судӣ, онҳо аз тарафи судҳои болоӣ бекор мешаванд.

Мо тамоми суханрониҳо, пешниҳодҳо, эродҳо ва ҳидоятҳои Сарвари давлатро бояд сармашқи фаъолияти хеш қарор диҳем. Зеро, чи тавре Президенти мамлакат борҳо таъкид кардаанд, мардум аз кормандони сохторҳои қудратӣ, аз ҷумла прокуратура ва суд, умедвории зиёд доранд ва бар он боваранд, ки маҳз донишу маърифат ва зиракии сиёсии онҳо ҳақро ба ҳақдор мерасонад ва адолатро рӯйи об мебарорад.

 

Фаррух ҒАНИЗОДА,

муовини якуми раиси суди ноҳияи Ёвон