Иттифоқҳои касабаи Тоҷикистон тули 97 соли фаъолияташон роҳи бузурги пуршарафро тай намуда, дар густариши иқтисодиёт ва ҳалли масъалаҳои рушди иҷтимоии кишварамон саҳми арзанда доранд. Таърихи иттифоқҳои касабаи Тоҷикистон расман аз моҳи апрели соли 1926 бо баргузории анҷумани нахустин сарчашма мегирад. 

Иттифоқи касабаи кормандони тандурустӣ ва ҳифзи иҷтимоии Ҷумҳурии Тоҷикистон яке аз бузургтарин ташкилоти соҳавии иттифоқҳои касабаи Тоҷикистон буда, кормандони муассиса, ташкилоту корхонаҳои табобатӣ-профилактикӣ, дорутайёркунӣ, осоишгоҳию курортӣ, илмӣ-тадқиқотӣ, марказҳои илмии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ва дигар сохторҳои хориҷиро, ки бо фаъолияти тиббию солимгардонӣ машғуланд, қатъи назар аз моликияташон, инчунин, донишҷӯёни таълимгоҳҳои олӣ ва миёнаи соҳа ва нафақахӯронро муттаҳид менамояд. 

 Дар даврони соҳибистиқлолии кишвар, иттифоқи касабаи соҳа панҷ анҷуман, 15 пленум ва зиёда аз 100 ҷаласаи раёсатро доир намуда, масълаҳои гуногуни марбут ба фаъолияти соҳа, аз ҷумла ҳимояи ҳуқуқ ва манфиатҳои иҷтимоию меҳнатии аъзоён, шуғли кормандони соҳа, адои хизмат, муносибатҳои меҳнатӣ, шароит ва пардохти музди меҳнат, ҳифзи саломатӣ, риояи кафолатҳои иҷтимоӣ, суғуртаи иҷтимоӣ, гузарондани чорабиниҳои фарҳангиву варзиширо, мавриди баррасӣ қарор додааст. Маҳз бо мусоидати иттифоқи касабаи соҳа аксарияти муаммоҳои чойдошта дар самти кумакпулиҳои суғуртавӣ, ба ҷои кор барқарор намудани меҳнаткашони ғайриқонунӣ аз кор сабукдӯшшуда ба таври мусбат ҳалли худро меёбанд. 

Кумитаи ҷумҳуриявии иттифоқи касаба дар ҳайати худ се кумитаи вилоятӣ, зиёда аз 430 кумитаи ибтидоии иттифоқи касабаро муттаҳид менамояд.

Ҳамасола бахшида ба иду ҷашнҳо, аз ҷумла Иди байналмилалии Наврӯз, Рӯзи Модар, Рӯзи Ғалаба, Рӯзи Ваҳдати миллӣ ва Рӯзи Истиқлоли давлатии Ҷумҳурии Тоҷикистон бо дастгирии Кумитаи иттифоқи касабаи кормандони тандурустии Тоҷикистон мусобиқаҳои варзишию солимгардонӣ, озмунҳои касбӣ, олимпиадаҳои тахассусӣ дар байни кормандону донишҷӯёни соҳа гузаронда шуда, ғолибон қадр карда мешаванд.

Пешрафти фаъолият ва дастовардҳои ягон сохтор бе кормандони соҳибихтисосу лаёқатманд муяссар намешавад. Аз рӯзи таъсис ёфтани кумита шахсиятҳои кордон дар сатҳи ҷумҳуриявӣ: М. Уссонов, В. Гречук, Т. Иброҳимов, К. Баротов, Н. Трофиметс, М. Юсуфҷонов, З. Мирзоев, Ҷ. Имомзода, Р. Ӯлмасов ва чанде дигарон барои пешрафти иттифоқи касабаи кормандони тандурустӣ ва ҳифзи иҷтимоии Тоҷикистон саҳми арзанда гузошта, фаъолият намуда истодаанд.

Имрӯзҳо Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, кумитаи иттифоқи касабаи соҳа барои беҳтар намудани шароити фаъолияти кормандон, раванди ислоҳот дар соҳа, ҳамаи шароитҳои заруриро муҳайё месозанд. Кормандони соҳа аз роҳбарият то корманди тибби хурд вазифадорем, ки дар ин фазои сулҳу оромие, ки Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бароямон муҳайё сохтаанд, дастаҷамъона, софдилона ва содиқона ба мардум хизмат намоем. 

Рӯзи Иттифоқҳои касабаи Тоҷикистонро ба ҳамаи ҳамватанон ва ҳамкасбон муборакбод гуфта, барояшон барору комёбиҳои беназирро таманно дорам. 

 

Муҳаммадҷон САИДОВ,

мудири ташхисгоҳи беморхонаи №5,

раиси иттифоқи касабаи беморхона,

Аълочии тандурустии Тоҷикистон