Туфайли Иҷлосияи XVI Шурои Олӣ дар кишвар Ҳукумати конститутсионӣ барқарор гардид ва шахсияти арзандае Сарвари давлат интихоб шуд, ки рушду такомул, сулҳу ваҳдат ва пешрафти минбаъдаи кишвар бо номи ӯ вобастагӣ дошту дорад. Иҷлосия истиқлоли воқеии миллати тоҷикро бо сарварии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон таъмин намуда, барои худшиносии миллӣ ва иқдомҳои муҳими сиёсию иҷтимоӣ ва фарҳангӣ заминаи мусоид фароҳам овард. 

Пас аз пурра татбиқ гаштани нуктаҳои Созишномаи истиқрори сулҳ ва созгории миллӣ, яъне соли 2000-ум, Ҳукумати ҷумҳурӣ бо ба кор бурдани тамоми имкониятҳои давлат ба бунёди иншооти барои пешрафти минбаъдаи мамлакат муҳим, аз ҷумла роҳҳои оҳану мошингард, истихроҷ ва истифодаи конҳои маъдан, бунёди неругоҳҳои хурду бузурги барқ, нақбҳо ва даҳҳо сохтмонҳо оғоз намуда, корхонаҳоеро, ки қисман ва ё тамоман аз фаъолият бозмонда буданд, ба кор даровард.  Ҳамин тавр, дар бист соли ахир рушди миёнасолонаи иқтисодиёт дар сатҳи 7,5 фоиз таъмин гардида, маҷмуи маҳсулоти дохилии мамлакат аз 1,8 миллиард сомонии соли 2000-ум то 95 миллард сомонӣ дар соли 2021 ва даромади Буҷети давлатӣ аз 252 миллион сомонӣ то 33 миллиард сомонӣ дар соли 2022 расонда шуд. Яъне, маҷмуи маҳсулоти дохилӣ қариб 53 баробар ва Буҷети давлатӣ 130 баробар зиёд гардида, ҳаҷми маҷмуи маҳсулоти дохилӣ ба ҳар нафар аҳолӣ беш аз 30 баробар   афзуд. 

Имрӯзҳо, ки мо дар арафаи таҷлили 30-юмин солгарди баргузории Иҷлосияи XVI Шурои Олии Ҷумҳурии Тоҷикистон ҳастем, бо итминони комил гуфта метавонем, ки аз сангинтарин имтиҳони таърих ва рӯзҳои пурталотуми эъмори давлатдории миллиамон гузашта, имрӯз ба сулҳу суботи комил расидем ва зарур аст, ки дар ҷаҳони пуртазодди муосир ин дастоварди нодири халқамонро чун гавҳари бебаҳо ҳифз намоем.

 

М. ШЕРЗОД, мутахассиси бахши минтақавии Агентии 

хизмати давлатии назди  Президенти Ҷумҳурии Тоҷикистон 

дар шаҳри Кӯлоби вилояти Хатлон